കാണ്പൂര്: പതിനെട്ട് ദിവസം മാത്രം പ്രായമുള്ള കുഞ്ഞിനെ ആശുപത്രിയുടെ രണ്ടാം നിലയില് നിന്ന് താഴേയ്ക്കെറിഞ്ഞ് അമ്മായിയുടെ ക്രൂരത. ഉത്തര്പ്രദേശിലെ കാണ്പൂരില് നിന്നാണ് ഞെട്ടിക്കുന്ന സംഭവം പുറത്ത് വന്നത്. സ്വന്തം അനന്തരവനെതിരായ ക്രൂരത ആശുപത്രിയിലെ സിസിടിവി ക്യാമറയില് പതിഞ്ഞതോടെയാണ് അമ്മായി കുടുങ്ങിയത്.
ആസൂയയില് നിന്ന് ഉടലെടുത്ത പകയാണ് ദാരുണമായ സംഭവത്തിലേയ്ക്ക് വഴിവച്ചത്. തനിക്ക് മൂന്ന് പെണ്മക്കളാണെന്നിരിക്കെ നാതൂന് ആണ്കുഞ്ഞ് ജനിച്ചതാണ് അമ്മായിയെ ക്രൂര കൃത്യം ചെയ്യാന് പ്രേരിപ്പിച്ചത്.
ഭാഗ്യവശാല് കുട്ടിക്ക് ഒന്നും സംഭവിച്ചില്ല. താഴേയ്ക്കെറിഞ്ഞെങ്കിലും കുട്ടി ഒരു വലയിലാണ് പതിച്ചത്. കുറെ നേരമായി കുട്ടിയെ കാണാതിരുന്ന ബന്ധുക്കള് ആശുപത്രി അധികൃതരുമായി ബന്ധപ്പെട്ടു. തുടര്ന്ന് അധികൃതര് നടത്തിയ തെരച്ചിലില് കുട്ടി വലയില് കുടുങ്ങി കിടക്കുന്നതായി കണ്ടെത്തുകയും രക്ഷിക്കുകയുമായിരുന്നു. കുട്ടിയെ കണ്ടെത്താനുള്ള ശ്രമത്തിനിടെ അധികൃതരിലൊരാളുടെ കാലിന് ഒടിവ് സംഭവിച്ചതായും റിപ്പോര്ട്ടുണ്ട്.
ആശുപത്രി അധികൃതര് സിസിടിവി ദൃശ്യങ്ങള് പരിശോധിച്ചതോടെയാണ് കുട്ടിയുടെ അമ്മായി തന്നെയാണ് ക്രൂര കൃത്യം നടത്തിയതെന്ന് തെളിഞ്ഞത്. പോലീസ് ഇവരെ അറസ്റ്റ് ചെയ്തു.
കുട്ടിയുമായി മുറിയില് നിന്ന് പുറത്തെത്തുന്ന അമ്മായി ബാല്ക്കണിക്ക് സമീപമുള്ള റെയിലിങില് തുണി വിരിക്കുന്നു. തുടര്ന്ന് അവിടെ നിന്ന് പോകുന്ന ഇവര് തിരിച്ചെത്തുമ്പോള് കൈയില് കുട്ടിയില്ല. നേരത്തെ റെയിലിങില് വിരിച്ച തുണിയുമായി ഇവര് മുറിയിലേയ്ക്ക് മടങ്ങുന്നു. ഇത്രയുമാണ് സിസിടിവി ദൃശ്യങ്ങളില് നിന്ന് വ്യക്തമാകുന്നത്.
