തിരുവനന്തപുരം: രാജ്യത്തെ യുവാക്കള്ക്കുവേണ്ടി വിദ്യാഭ്യാസ തൊഴില് നൈപുണ്യക്ഷേമപദ്ധതികള്ക്ക് വ്യക്തമായ ദിശാബോധം നല്കിയത് പ്രധാനമന്ത്രി നരേന്ദ്ര മോദിയാണെന്ന് കോഴിക്കോട് സര്വകലാശാല മുന് വിസിയും ബിജെപി സംസ്ഥാന ഉപാധ്യക്ഷനുമായ ഡോ. അബ്ദുള് സലാം. തിരുവനന്തപുരത്ത് വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം.
ജനസംഖ്യയുടെ 65 ശതമാനത്തോളം വരുന്ന 35 വയസിന് താഴെയുള്ള ചെറുപ്പക്കാരാണ് രാജ്യത്തിന്റെ ഏറ്റവും വലിയ സമ്പത്ത്. കഴിഞ്ഞ 12 വര്ഷത്തിനിടെ മോദി സര്ക്കാര് നടപ്പിലാക്കിയ 359 പദ്ധതികളില് 212 എണ്ണവും യുവാക്കളെ കേന്ദ്രീകരിച്ചുള്ളതാണ്. യുവാക്കള്, സ്ത്രീകള്, പാവപ്പെട്ടവര് എന്നിവരുടെ ക്ഷേമത്തിനാണ് നരേന്ദ്ര മോദി ഭരണത്തില് എപ്പോഴും മുന്ഗണന നല്കുന്നതെന്നും അദ്ദേഹം പറഞ്ഞു. നീറ്റ് പരീക്ഷ ചോദ്യപേപ്പര് ചോര്ച്ചയും ക്രമക്കേടുകളും കുട്ടികളുടെ ഭാവിയെ സാരമായി ബാധിക്കുന്ന കാര്യമാണെന്നതില് സംശയില്ല. 23 ലക്ഷത്തോളം വിദ്യാര്ത്ഥികള് എഴുതിയ നീറ്റ് പരീക്ഷയില് ക്രമക്കേടുകള് ഉണ്ടായപ്പോള് ഏറ്റവും കൂടുതല് ആശങ്കപ്പെടുകയും പ്രതികരിക്കുകയും ചെയ്തത് പ്രധാനമന്ത്രി നരേന്ദ്ര മോദിയാണ്. ലോകം യുദ്ധത്തിന്റെയും മറ്റ് പ്രതിസന്ധികളിലൂടെയും കടന്നുപോകുമ്പോഴും നീറ്റ് പരീക്ഷയിലുണ്ടായ ക്രമക്കേടുകള്ക്കെതിരെ ഉടനടി അന്വേഷണം നടത്താനും തെറ്റുകാര്ക്ക് ശിക്ഷ ഉറപ്പാക്കാനും പരീക്ഷകള് വീണ്ടും വേഗത്തില് നടത്താനും നിര്ദേശം നല്കിയത് പ്രധാനമന്ത്രി നരേന്ദ്ര മോദിയാണ്. ഭാവിയില് ഇത്തരം സംഭവങ്ങള് ആവര്ത്തിക്കാതിരിക്കാനുള്ള നടപടികള്ക്കും അദ്ദേഹം തുടക്കമിട്ടു.
പ്രധാനമന്ത്രിയുടെ വസതിക്ക് സമീപം പ്രതിപക്ഷ എംപിമാര് അനാവശ്യ ക്രമസമാധാന പ്രശ്നങ്ങള് സൃഷ്ടിക്കുന്നത് രാഷ്ട്രീയ താത്പര്യങ്ങള്ക്ക് വേണ്ടിയാണ്. തോല്വിയും തിരിച്ചടികളും നേരിട്ടപ്പോള് ജനശ്രദ്ധ ആകര്ഷിക്കാനും യുവാക്കളെ വഴിതെറ്റിക്കാനും വേണ്ടിയാണ് ഇത്തരത്തിലുള്ള പിന്തിരിപ്പന് രാഷ്ട്രീയം പ്രതിപക്ഷം നടത്തുന്നത്. ഭാരതം ഏഴ് ശതമാനത്തിലധികം സാമ്പത്തിക വളര്ച്ച നേടി മുന്നേറുമ്പോള്, രാജ്യത്തെ അസ്ഥിരപ്പെടുത്താന് വിദേശ ശക്തികളും ശ്രമിക്കുന്നുണ്ട്. ഇത്തരം വിദേശ ശക്തികളുടെ അജണ്ടകള്ക്കും പ്രതിപക്ഷത്തിന്റെ തന്ത്രങ്ങള്ക്കും യുവാക്കളെ കരുവാക്കുന്നത് മാധ്യമങ്ങളും ജനങ്ങളും യുവതലമുറയും തിരിച്ചറിയണമെന്നും അബ്ദുള് സലാം പറഞ്ഞു.
