കലാലയ സംരക്ഷണ സമിതിയുടെ നേത്യത്വത്തില് പ്രതിഷേധ സംഗമം ബിജെപി ജില്ലാ ജനറല് സെക്രട്ടറി ഡി. അശ്വനിദേവ് ഉദ്ഘാടനം ചെയ്യുന്നു
ചേര്ത്തല: അദ്ധ്യാപക ദിനത്തില് വിദ്യാര്ത്ഥി പീഡനത്തിനെതിരെ കലാലയ സംരക്ഷണ സമിതിയുടെ നേത്യത്വത്തില് പ്രതിഷേധ സംഗമം. ചേര്ത്തല എന്എസ്എസ് കോളേജില് വിദ്യാര്ത്ഥികളും രക്ഷകര്ത്താക്കളും നാട്ടുകാരും ചേര്ന്നാണ് പ്രതിഷേധസംഗമം സംഘടിപ്പിച്ചത്.
ഇവിടുത്തെ അദ്ധ്യാപകന് റ്റിസി വാങ്ങാന് കോളേജില് എത്തിയ രതുല് രജി എന്ന മലയാളം രണ്ടാംവര്ഷ വിദ്യാര്ത്ഥിയെ ജാതിപ്പേര് വിളിച്ച് ആക്ഷേപിക്കുകയും അമ്മയെ മുടിക്ക് കുത്തി പിടിച്ച് അസഭ്യം പറയുകയും ചെയ്തിട്ട് പോലിസില് നല്കിയ പരാതി ഭരണസ്വാധിനം ഉപയോഗിച്ച് ഒതുക്കി. കണ്മുന്നില് ദളിത് പീഡനം കണ്ടിട്ടും കണ്ടില്ല എന്ന് നടിക്കുന്ന കോളേജ് പ്രിന്സിപ്പലിന്റെ ഒത്താശയില് നടക്കുന്ന വിദ്യാര്ത്ഥി പീഡനത്തിന് എതിരെ ജനങ്ങള് ഒന്നടങ്കം സംഘടിക്കുകയായിരുന്നു.
സമ്മേളനം ബിജെപി ജില്ലാ ജനറല് സെക്രട്ടറി ഡി. അശ്വിനിദേവ് ഉദ്ഘാടനം ചെയ്തു. ആര്എസ്എസ് ജില്ലാ ബൗദ്ധിക് പ്രമുഖ് കെ.ആര്. സുബ്രഹ്മണ്യന് അദ്ധ്യക്ഷത വഹിച്ചു. പെരുമ്പളം ജയകുമാര്, കെ.എം. മഹേഷ്, അഡ്വ വി.എസ്. രാജന്, എം.വി. രാമചന്ദ്രന്, വിമല് രവീന്ദ്രന്, കെ.എസ്. പ്രദിപ്, സജിമോള് മഹേഷ് തുടങ്ങിയവര് നേതൃത്വം നല്കി.
