നെയ്യാറ്റിന്കര: കേരളത്തില് സിപിഎം ജനാധിപത്യ വിശ്വാസങ്ങളെ തകര്ക്കുന്ന പ്രസ്ഥാനമായി മാറികഴിഞ്ഞുവെന്ന് ബിജെപി ജില്ലാ പ്രസിഡന്റ് അഡ്വ എസ്. സുരേഷ്. നവോത്ഥാനനായകന്മാരെ അപമാനിച്ച കമ്മ്യൂണിസ്റ്റുകാര് ഹിന്ദുമതവിശ്വാസങ്ങളെ തകര്ത്തുകഴിഞ്ഞു.
വരുംനാളുകളില് ക്രിസ്ത്യന് മതവിശ്വാസങ്ങളെയും ഇസ്ലാം മതവിശ്വാസങ്ങളെയും തകര്ക്കുവാന് വേണ്ട പ്രവര്ത്തനത്തിലാണ് സിപിഎം. കാരക്കോണം സ്കൂളില് പഠിക്കുവാന്പോയ വിദ്യാര്ത്ഥികളുടെ കൈയില്കെട്ടിയ രാഖിയെ ബലം പ്രയോഗിച്ച് വലിച്ചുപൊട്ടിക്കുകയും കുന്നത്തുകാല് പഞ്ചായത്തിന്റെ വിവിധഭാഗങ്ങളില് സിപിഎം നടത്തുന്ന അക്രമ രാഷ്ട്രീയത്തിനെതിരെ ബിജെപി കുന്നത്തുകാല് പഞ്ചായത്തിന്റെ നേതൃത്വത്തില് നടന്ന ജനകീയപ്രതിഷേധ യോഗം ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ കുറേനാളുകളായി സിപിഎമ്മും പോലീസും ഒത്തുചേര്ന്ന് ബിജെപി പ്രവര്ത്തകര്ക്കുനേരെ അക്രമം അഴിച്ചുവിടുകയാണ്. പ്രവര്ത്തകരെ കള്ളകേസ്സുകളില് കുടുക്കുകയും ചെയ്യുന്നു. പിണറായി സര്ക്കാര് അധികാരത്തില് കയറി 100 ദിവസത്തിനകം നിരവധിപേരാണ് അക്രമരാഷ്ട്രീയത്തില് കൊലചെയ്യപ്പെട്ടത്. ഇത്തരം പ്രവര്ത്തനങ്ങള് സിപിഎം അവസാനിപ്പിച്ചില്ലെങ്കില് ബിജെപി ജനകീയമായ പ്രക്ഷോഭങ്ങള് സംഘടിപ്പിക്കുമെന്നും അദ്ദേഹം കൂട്ടിചേര്ത്തു. ബിജെപി കുന്നത്തുകാല് പഞ്ചായത്ത് പ്രസിഡന്റ് ശ്രീകുമാര് അദ്ധ്യക്ഷത വഹിച്ച യോഗത്തില് ജില്ലാ ജനറല് സെക്രട്ടറി ബിജു ബി. നായര്, മണ്ഡലം പ്രസിഡന്റ് അജിത്ത്, മണ്ഡലം ജനറല് സെക്രട്ടറിമാരായ അരുവിയോട് സജി, അഡ്വ മഞ്ചവിളാകം പ്രദീപ്, യുവമോര്ച്ച സംസ്ഥാനസമിതി അംഗം മണവാരി രതീഷ്, യുവമോര്ച്ച ജില്ലാ വൈസ്പ്രസിഡന്റ് ശ്രീരാഗ്, യുവമോര്ച്ച മണ്ഡലം പ്രസിഡന്റ് സജിത്ത്, ബിജെപി കുന്നത്തുകാല് പഞ്ചായത്ത് ജനറല് സെക്രട്ടറി ശ്രീകണ്ഠന് തുടങ്ങിയവര് സംസാരിച്ചു.
