തൃക്കരിപ്പൂര്: പിണറായി സര്ക്കാര് ദേശീയതയെയും നാടിന്റെ സംസ്കാരത്തെയും ഹിന്ദുത്വത്തെയും അപമാനിക്കുകയാണെന്ന് ബിജെപി കാസര്കോട് ജില്ലാ പ്രസിഡണ്ട് അഡ്വ: കെ.ശ്രീകാന്ത് പറഞ്ഞു. ബിജെപി തൃക്കരിപ്പൂര് മണ്ഡലം സജീവ അംഗങ്ങളുടെ കണ്വെന്ഷന് ചീമേനിയില് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
പൂക്കളത്തെയും നിലവിളക്കിനെയും പ്രാര്ത്ഥനയേയും വര്ഗ്ഗീയമായികണ്ട് ഇല്ലാതാക്കാന് ശ്രമിക്കുകയാണ് പിണറായി. നമ്മള് ഒന്ന് എന്ന് പറയുന്ന മന്ത്രത്തെ പോലും എതിര്ക്കുകയാണ്. ഹിന്ദു വിരുദ്ധ സമീപനമാണ് സര്ക്കാരും മാര്ക്സിസ്റ്റ് പാര്ട്ടിയും സ്വീകരിക്കുന്നത്. ചട്ടമ്പി സ്വാമികളെയും ശ്രീനാരായണഗുരുവിനെയും അയ്യന്ങ്കാളിയെയും വിവേകാനന്ദനെയും അപമാനിച്ചവര് ഇപ്പോള് ഇവരെ ഉപയോഗിച്ച് മുതലെടുപ്പ് നടത്തുകയാണ്. നവോത്ഥാന നായകര് ഉയര്ത്തിയ ആശയങ്ങള് വികലമാക്കാനും തകര്ക്കാനുമാണ് മാര്ക്സിസ്റ്റ് പാര്ട്ടി ശ്രമിക്കുന്നത്. നാളിതുവരെ ദളിതനെയോ പിന്നാക്ക വിഭാഗക്കാരനെയോ ഉയര്ത്തി കൊണ്ടുവരാനോ മുഖ്യമന്ത്രിയാക്കുവാനോ സിപിഎമ്മിന് സാധിച്ചിട്ടില്ല. ഇഎംഎസ്സും നായനാരും ജാതി പേര് മാറ്റാന് പോലും തയ്യാറായിട്ടില്ലെന്നും ഇന്നും ജാതീയത മാര്ക്സിസ്റ്റ് പാര്ട്ടിയിലുണ്ടെന്നും ശ്രീകാന്ത് പറഞ്ഞു.
ഓണത്തോടനുബന്ധിച്ച് സര്ക്കാര് ഓഫീസില് പൂക്കളം തീര്ക്കാന് പാടില്ലെന്ന് പറഞ്ഞ പിണറായി വിജയന് ഓഫീസ് അടച്ചുപൂട്ടി പണിമുടക്കാന് ആഹ്വാനം ചെയ്തു. കേരളം ഭരിക്കുന്ന ചില മന്ത്രിമാര് മത നേതാക്കളുടെ അടിവസ്ത്രം നോക്കി നടക്കുകയാണ്. വെളിച്ചത്തെ പേടിക്കുന്ന ഇവര് നിലവിളക്ക് കൊളുത്താന് പാടില്ലെന്ന് പറയുന്നു. ശബരിമലയെ കൊള്ളയടിക്കാന് കണ്ണും നട്ടിരിക്കുകയാണ് പിണറായി വിജയനും കൂട്ടാളികളും. ഇപ്പോള് തന്നെ ശബരി മലയിലെത്തുന്ന ഭക്തജനങ്ങളെ കൊള്ളയടിക്കുകയാണ്. കേരളത്തില് ഇന്ന് യഥാര്ത്ഥ പ്രതിപക്ഷം ബിജെപിയാണെന്നും കോണ്ഗ്രസ്സും യു ഡിഎഫും തകര്ന്നുകൊണ്ടിരിക്കുകയാണെന്നും അദ്ദേഹം കൂട്ടിച്ചേര്ത്തു. തൃക്കരിപ്പൂര് മണ്ഡലം പ്രസിഡണ്ട് എം.ഭാസ്കരന് അധ്യക്ഷത വഹിച്ചു. സംസ്ഥാന കൗണ്സില് അംഗം ടി.കുഞ്ഞിരാമന്, ജില്ലാ സെക്രട്ടറി കുഞ്ഞിക്കണ്ണന് ബളാല്, പി.വി.രാമചന്ദ്രന്, എന്നിവര് സംസാരിച്ചു. വെങ്ങാട്ട് കുഞ്ഞിരാമന് സ്വാഗതവും പി.യു.വിജയകുമാര് നന്ദിയും പറഞ്ഞു.
