തലശ്ശേരി: ബിജെപി പ്രവര്ത്തകരായ രണ്ടുപേരെ ബോംബെറിഞ്ഞും വെട്ടിയും കൊലപ്പെടുത്തിയ ശേഷം വിദേശത്തേക്ക് രക്ഷപ്പെട്ട സിപിഎമ്മുകാരന് പിടിയിലായി. ന്യൂമാഹി ജോയി അങ്ങാടിക്കടുത്ത് വെച്ച് ബിജെപി പ്രവര്ത്തകരെ കൊലപ്പെടുത്തിയ കേസിലെ പ്രതി ചൊക്ലി കണ്ണോത്ത് പള്ളിക്കടുത്ത തവക്കല് മന്സിലില് കെ.സി.സജീറിനെ (28)യാണ് കരിപ്പൂര് എയര്പോര്ട്ട് പോലീസ് പിടികൂടി തലശ്ശേരി പോലീസിന് കൈമാറിയത്.
2010 മെയ് 28 ന് രാവിലെ 10 മണിയോടെയാണ് സിപിഎം കൊടുംക്രിമിനലുകളായ കൊടിസുനി ഉള്പ്പെടെയുള്ള പതിനാറംഗ സംഘം ബിജെപി പ്രവര്ത്തകരായ മാടേന്കണ്ടി വീട്ടില് വിജിത്ത് (28), കുറുന്തോടത്ത് ഷിനോജ് (30) എന്നിവരെ ബൈക്കില് സഞ്ചരിക്കവേ ബോംബെറിഞ്ഞ് വീഴ്ത്തിയശേഷം വെട്ടിക്കൊലപ്പെടുത്തിയത്. കേസിലെ 12-ാം പ്രതി പള്ളൂരിലെ മുഹമ്മദ് റജീഷ് (25) റിമാന്റ് കാലാവധിക്ക് ശേഷം പള്ളൂരിലുണ്ടായ വാഹനാപകടത്തില് കൊല്ലപ്പെട്ടിരുന്നു.
കൊയ്യോട്ട് തെരുവിലെ സുജിത്ത്, ചാലക്കരയിലെ എ.കെ.സുനില് കുമാര്, ചാലക്കര കോളനിയിലെ പി.കെ.സുമേഷ്, ചൊക്ലി രജിസ്ട്രാഫീസിനടുത്തുള്ള പറമ്പത്ത് വീട്ടില് മുഹമ്മദ് ഷാഫി, പള്ളൂരിലെ ടി.പി.ഷമല്, കവിയൂരിലെ എ.കെ.ഷിമോഷ്, പള്ളൂരിലെ പി.പി.രാഹുല്, ചാലക്കരയിലെ കെ.വി.വിനീഷ്, പാറാലിലെ സി.കെ.രജികാന്ത്, പള്ളൂരിലെ വിജിത്ത്, പള്ളൂരിലെ ആശീര്വാദില് ഷിനോജ്, ന്യൂമാഹിയിലെ എടക്കാന്റവിട ഫൈസല് എന്നിവരാണ് ഇപ്പോള് പിടിയിലായ സജീറിനെ കൂടാതെ ഇരട്ടക്കൊലപാതകക്കേസുകളിലെ മറ്റു പ്രതികള്.
