കണ്ണൂര്: ദേശീയപാതകളില് അപകടങ്ങളില്പ്പെടുന്നവര്ക്ക് ഉടന് ചികിത്സ ലഭ്യമാക്കാനുള്ള സംവിധാനവുമായി ഹൈവേ പോലീസ്. ഇതിന്റെ ഭാഗമായുള്ള ആംബുലന്സ് സര്വീസ് കണ്ണൂരില് പ്രവര്ത്തനം ആരംഭിച്ചു. റോഡപകടങ്ങളില്പ്പെടുന്നവര് വാഹനങ്ങള് കിട്ടാത്തതു കാരണം മണിക്കൂറുകളോളം റോഡില് കിടക്കേണ്ടി വരുന്നതും മരണത്തിനു കീഴടങ്ങേണ്ടി വരുന്നതും വര്ധിച്ച സാഹചര്യത്തിലാണ് കേരള പോലീസ് ഹൈവേ ആംബുലന്സ് പദ്ധതി നടപ്പാക്കിയത്. ഭാരത് പെട്രോളിയം ലിമിറ്റഡ് സ്പോണ്സര് ചെയ്ത മൂന്ന് ആംബുലന്സാണ് സംസ്ഥാനത്ത് സര്വീസ് നടത്തുക. കൊച്ചിയിലും തൃശൂരിലും ഹൈവേ പോലീസിന്റെ ആംബുലന്സ് സര്വീസ് നേരത്തെ ആരംഭിച്ചിരുന്നു.
കണ്ണൂര് ജില്ലയിലെ ആംബുലന്സ് സര്വീസിന്റെ ഉദ്ഘാടനം കഴിഞ്ഞ ദിവസം എആര് ക്യാമ്പില് എസ്പി സഞ്ജയ് കുമാര് ഗുരുഡിന് ഫ്ളാഗ് ഓഫ് ചെയ്തു നിര്വഹിച്ചു.
ദേശീയ പാതയിലെ മാഹിപാലം മുതല് ആണൂര് പാലം വരെയാണ് ആംബുലന്സിന്റെ സേവനം ലഭിക്കുക. റോഡപകടങ്ങളില്പ്പെടുന്ന ആശുപത്രിയിലെത്തിക്കാന് മാത്രമായിരിക്കും ആംബുലന്സ് സര്വീസ് നടത്തുക. 24 മണിക്കൂറും ആംബുലന്സിന്റെ സേവനം ലഭിക്കും. ഫോണ്: 0497 2808100.
