പയ്യാവൂര്: മലയോരഹൈവേ നിര്മ്മാണം നിര്ത്തിവെച്ച സംസ്ഥാന സര്ക്കാറിന്റെ തീരുമാനത്തിനെതിരെ പ്രതിഷേധം ശക്തമാകുന്നു. എകെസിസിയുടെ നേതൃത്വത്തില് പയ്യാവൂര് ടൗണില് അടുപ്പുകൂട്ടി സമരം സംഘടിപ്പിച്ചു. ഓള് കേരള കത്തോലിക്ക കോണ്ഗ്രസ് അതിരൂപതാ ഡയറക്ടര് ഫാ.ഫ്രാന്സിസ് മേച്ചിറാകത്ത് ഉദ്ഘാടനം ചെയ്തു. കാലങ്ങള്ക്ക് മുമ്പ് സ്വന്തം പറമ്പിലൂടെ വഴി വെട്ടിക്കൊടുത്തും വഴിക്ക് വീതി കൂട്ടിക്കൊടുത്തും കെട്ടിയുയര്ത്തിയ മതിലും വീടിന്റെ മുറ്റവും കൂടി ഇടിച്ചു കൊടുത്താണ് മലയോര ഹൈവേ അന്വര്ത്ഥമാക്കിയതെന്നും എന്നാല് ഇതെല്ലാം മറന്ന് മലയോര ജനതയെ അവഗണിക്കുകയാണെന്നും അദ്ദേഹം പറഞ്ഞു. കര്ഷകന് ഈ മലയോര ഹൈവേ പണിയാന് സ്വരുക്കൂട്ടിയ ഫണ്ട് എവിടേക്കാണ് വകമാറ്റിയതെന്ന് വ്യക്തമാക്കണമെന്ന് അദ്ദേഹം പറഞ്ഞു. ഓരോ റോഡിനും ജാതിമത ഭേദമന്യേ നന്മയ്ക്ക് വേണ്ടി നിലകൊണ്ടതിന്റെ ഒരു കഥ പറയാനുണ്ടെന്നും നമ്മുടെ നിഷ്ക്രിയത്വം ഒരു നാടിന്റെ ഭാവിയെത്തന്നെ ഇരുട്ടിലേക്ക് തള്ളിവിട്ടേക്കാമെന്നും ഈ പ്രശ്നങ്ങളൊന്നും നമ്മുടേതല്ല എന്നു കരുതിയാല് ദുരന്തങ്ങള് നമ്മുടെ വീട്ടിലേക്ക് വന്നുകയറുമെന്ന സൂചനയാണ് ഈ ഉത്തരവെന്നും അദ്ദേഹം പറഞ്ഞു.
റവ ഡോ.ജോസ് വെട്ടിക്കല് അദ്ധ്യക്ഷത വഹിച്ചു. എകെസിസി സംസ്ഥാന വൈസ് പ്രസിഡന്റ് അഡ്വ.ടോണി ജോസഫ്, ഫാ.ജോസഫ് കദളിയില്, ഫാ. അരുണ് മുയല്കല്ലുങ്കല്, എന്.പി.ജോസഫ് എന്നിവര് പ്രസംഗിച്ചു. അടുപ്പുകൂട്ടി സമരത്തിന് മുന്നോടിയായി നൂറുകണക്കിനാളുകള് പയ്യാവൂര് ടൗണില് പ്രതിഷേധ പ്രകടനം നടത്തി.
മലയോര ഹൈവേയുടെ പ്രവര്ത്തി നിര്ത്തിവെക്കാന് ഉത്തരവിട്ട സംസ്ഥാന സര്ക്കാറിന്റെ നടപടിക്കെതിരെ ഇന്ന് ഇരിക്കൂര് നിയോജക മണ്ഡലത്തില് യുഡിഎഫ് ആഹ്വാന പ്രകാരം ഹര്ത്താല് നടക്കും. രാവിലെ 6മുതല് വൈകീട്ട് 6 വരെയാണ് ഹര്ത്താല്. പാല്, പത്രം,ആശുപത്രി, മെഡിക്കല് ഷോപ്പ് എന്നിവയെ ഹര്ത്താലില് നിന്നും ഒഴിവാക്കിയിട്ടുണ്ട്. മണ്ഡല അതിര്ത്തിക്ക് പുറത്തു നിന്നും കടന്നുവരുന്ന വാഹനങ്ങളെ മണ്ഡലത്തിനകത്തേക്ക് കടത്തിവിടില്ലെന്നും ഹര്ത്താല് ആഹ്വാനക്കാര് അറിയിച്ചിട്ടുണ്ട്. ഹൈവേ നിര്മ്മാണം നിര്ത്തിവെച്ച നടപടി പിന്വലിക്കണമെന്നാവശ്യപ്പെട്ട് കഴിഞ്ഞ ദിവസം ബിജെപി ഇരിക്കൂര് മണ്ഡലത്തില് കരിദിനം ആചരിച്ചിരുന്നു.
