ലാഡര്ഹില്: ആദ്യ കളിയില് കണ്ട റണ് മഴ ഇന്നലെയുണ്ടായില്ല. ഇന്ത്യന് ബൗളര്മാര് വിക്കറ്റുകള് കൊണ്ട് അമ്മാനമാടിയപ്പോള്, ടോസ് നഷ്ടപ്പെട്ട് ബാറ്റിങ്ങിനിറങ്ങേണ്ടിവന്ന വെസ്റ്റിന്ഡീസ് പതറി. 19.4 നാലോവറില് 143 റണ്സിന് എല്ലാവരും പുറത്ത്.
കഴിഞ്ഞ ദിവസം ഇന്ത്യക്കാരെ അടിച്ചൊതുക്കിയ വിന്ഡീസിന്റെ നിഴല് മാത്രമായിരുന്നു ഇന്നലെ. ആര്. അശ്വിനും അമിത് മിശ്രയും ജസ്പ്രീത് ബുംറയും കൃത്യതോടെ പന്തെറിഞ്ഞപ്പോള് അവര് ശരിക്കും പതറി. ജോണ്സണ് ചാള്സ് (43) ടോപ് സ്കോറര്. ലെന്ഡല് സിമ്മണ്സ് (19), നായകന് കാര്ലോസ് ബ്രാത്ത്വെയ്റ്റ് (18), കീറോണ് പൊള്ളാര്ഡ് (13), ആന്ദ്രെ റസല് (13) എന്നിവരും രണ്ടക്കം കണ്ടു. 25 പന്തില് അഞ്ചു ഫോറും രണ്ടു സിക്സറും പറത്തി ചാള്സ്. അവസാന ഓവറുകളില് ബ്രാത്ത്വെയ്റ്റും, സുനില് നരെയ്നും (ഒമ്പത് നോട്ടൗട്ട്) നടത്തിയ ആക്രമണമാണ് സ്കോര് 140 കടത്തിയത്.
അമിത് മിശ്ര നാലോവറില് 24 റണ്സ് വഴങ്ങി മൂന്നു വിക്കറ്റെടുത്തപ്പോള്, അശ്വിന് മൂന്നോവറില് 11 റണ്സിന് രണ്ടു വിക്കറ്റ്. ജസ്പ്രീത് ബുംറ നാലോവറില് 26 റണ്സ് വിട്ടുകൊടുത്ത് രണ്ട് ഇരകളെ സ്വന്തമാക്കി. 2.4 ഓവറില് 31 റണ്സ് വഴങ്ങിമുഹമ്മദ് ഷാമിയും രണ്ട് വിക്കറ്റ് നേടി. ഭുവനേശ്വര് കുമാറിന് ഒരു വിക്കറ്റ്. രവീന്ദ്ര ജഡേജയ്ക്ക് വിക്കറ്റൊന്നും ലഭിച്ചില്ല.
ആദ്യ തോല്വി ഒരു റണ്ണിന്
ലാഡര്ഹില്: യുഎസില് ഇന്ത്യ കളിച്ച ആദ്യ ട്വന്റി20യില് വെസ്റ്റിന്ഡീസിനോട് ഒരു റണ് തോല്വി. എവിന് ലൂയിസിന്റെ (100) സെഞ്ചുറിക്കു മറുപടിയുമായി കെ.എല്. രാഹുല് (110 നോട്ടൗട്ട്) കളം നിറഞ്ഞപ്പോള് ജയമുറപ്പിച്ച ഇന്ത്യയ്ക്ക് ഡ്വെയ്ന് ബ്രാവൊയുടെ അവസാന ഓവറാണ് തിരിച്ചടിയായത്. എട്ടു റണ്സ് വേണ്ടിയിരുന്നപ്പോള് ഇന്ത്യയ്ക്ക് നേടാനായത് ആറു റണ്. അവസാന പന്തില് ധോണി പുറത്തായത് ജയം നിഷേധിച്ചു. സ്കോര്: വെസ്റ്റിന്ഡീസ് – 245/6 (20), ഇന്ത്യ – 244/4 (20).
ഓപ്പണര്മാരായ എവിന് ലൂയിസിനും (100), ജോണ്സണ് ചാള്സിനും (79) മറുപടിയായി രാഹുലും, രോഹിത് ശര്മയും (62), എം.എസ്. ധോണിയും (43) പൊരുതിയപ്പോള് ഇന്ത്യ ജയമുറപ്പിച്ചു. എന്നാല്, ബ്രാവൊയുടെ അവസാന ഓവര് കളി മാറ്റി. ആദ്യ അഞ്ചു പന്തില് ആറു റണ്സ് നേടിയപ്പോള്, അവസാന പന്തില് ധോണി ഷോര്ട്ട് തേഡ്മാനില് സാമുവല്സിന് പിടി നല്കി മടങ്ങി. ജയിച്ചിരുന്നുവെങ്കില് ട്വന്റി20യിലെ ഏറ്റവും വലിയ പിന്തുടരലായേനെ. കഴിഞ്ഞ വര്ഷം ദക്ഷിണാഫ്രിക്ക ഉയര്ത്തിയ 232നെതിരെ വിന്ഡീസ് 236 റണ്സ് നേടിയതാണ് മുന്പത്തെ റെക്കോഡ്.
ഓപ്പണറായെത്തിയ അജിങ്ക്യ രഹാനെയും (ഏഴ്), വിരാട് കോഹ്ലിയും (16) നിരാശപ്പെടുത്തിയപ്പോള്, ഓപ്പണര് രോഹിത് ശര്മയും നാലാമനായെത്തിയ ലോകേഷ് രാഹുലുമാണ് ഇന്ത്യയെ മുന്നോട്ടു നയിച്ചത്. 51 പന്തില് 12 ഫോറും അഞ്ചു സിക്സറും രാഹുലിന്റെ ബാറ്റില്നിന്ന് പറന്നു. 28 പന്തില് നാലു വീതം ഫോറും സിക്സറും നേടി രോഹിത്. പിന്നെടെത്തിയ ധോണിയും മോശമാക്കിയില്ല. 25 പന്തില് രണ്ടു വീതം ഫോറും സിക്സറും നേടി നായകന്. ലൂയിസാണ് കളിയിലെ താരം.
