ഐഎസ്ആര്ഒയുടെ മറ്റെരു ഉജ്ജ്വല തുടക്കമാണിത്. പുതിയ സാങ്കേതിക വിദ്യ. ലോകത്ത് മറ്റ് രാജ്യങ്ങള്ക്കൊന്നും ഉള്ളതായി വെളിപ്പെടുത്തിയിട്ടില്ലാത്ത സാങ്കേതിക വിദ്യ പരീക്ഷിച്ചു വിജയിച്ചു. വര്ഷങ്ങള് മുമ്പ് തുടങ്ങിയ പരീക്ഷണങ്ങളുടെ സാഫല്യം.
സാങ്കതികമായി കാര്യങ്ങള് ലളിതമാണ്. വിമാനത്തില് എങ്ങനെ വായു ലഭിക്കുന്നു? ഓക്സിജന് ആ രൂപത്തില് അതില് കരുതുന്നില്ല. പുറത്തുനിന്ന് ശേഖരിക്കുകയാണ്. ഇതേ സാങ്കേതിക വിദ്യ എങ്ങനെ റോക്കറ്റുകളില് വിനിയോഗിക്കാമെന്ന ചിന്തയുടെയും സങ്കല്പ്പത്തിന്റെയും സാക്ഷാത്കാരമാണിത്.
റോക്കറ്റ് വിക്ഷേപിക്കുമ്പോള് അന്തരീക്ഷത്തിലെ വിവിധ ഘട്ടങ്ങളിലൂടെ കടന്നുപോകാന് ആവശ്യമായ ഇന്ധനവും അത് ജ്വലിക്കാന് ആവശ്യമായ ഓക്സിജനും കൊണ്ടു പോകണം. എന്നാല്, വിമാനത്തിന്റെ സാങ്കേതിക വിദ്യ റോക്കറ്റില് നടപ്പാക്കാനാവുമോ എന്നതായിരുന്നു വെല്ലുവിളി. അത് അതിജീവിച്ചിരിക്കുന്നു.
പറയുമ്പോള് എളുപ്പമെന്നു തോന്നുമെങ്കിലും ഇതില് വരുന്ന പ്രതിസന്ധി വേഗതയാണ്. വിമാന വേഗത്തിന്റെ പത്തിരട്ടിയാണ് റോക്കറ്റിന്റേത്. ഈ വേഗതയില് വായു പുറത്തുനിന്ന് ശേഖരിക്കുക എളുപ്പമാണോ? പുറത്തുനിന്നുള്ള മര്ദ്ദം എങ്ങനെ നേരിടാനാവും? ഇതൊക്കെയായിരുന്നു വിഷയങ്ങള്. ആ പരീക്ഷണമാണ് ഇപ്പോള് വിജയം കണ്ടിരിക്കുന്നത്. ഇതിന്റെ നേട്ടമെന്തെന്നു ചോദിച്ചാല്, വിഷേപണ വാഹനത്തിന്റെ ഭാരം കുറയ്ക്കാം. ഇന്ധനവും ഓക്സിജനും വാഹനത്തില് കരുതേണ്ടിവരില്ല.
അമേരിക്ക റോക്കറ്റ് വിക്ഷേപണത്തിന് ഈ സാങ്കേതിക വിദ്യ ഉപയോഗിച്ചിട്ടുണ്ടെന്ന് അവകാശപ്പെടുന്നുണ്ട്. മറ്റു രാജ്യങ്ങളൊന്നും ഇങ്ങനെയൊരു പരീക്ഷണവിജയം പ്രഖ്യാപിച്ചിട്ടില്ല.
ഇതിന്റെ സാങ്കേതിക വിദ്യമുഴുവന് നമ്മുടെ സ്വന്തമാണ്. ഇതിലുപയോഗിക്കുന്ന ഭാഗങ്ങളും ഉപകരണങ്ങളും നമ്മുടെ സ്വന്തം ഉല്പ്പന്നമാണ്. അത്യുഗ്ര ചൂടില് പ്രവര്ത്തിക്കേണ്ട ലോഹങ്ങളാണവ പലതും. തികച്ചും നൂതനമായ സാങ്കേതിക വിദ്യയുടെ പരീക്ഷണ വിജയം നമ്മുടെ വലിയ നേട്ടമാണ്. ഇനി ഇത് വികസിപ്പിച്ചെടുക്കണം. ഇസ്രോയുടെ സുവര്ണ്ണകാലത്തെ ആസൂത്രണങ്ങളുടെ വിളവെടുപ്പാണിവയൊക്കെയും.
