കൊളംബൊ: ശ്രീലങ്കന് ക്രിക്കറ്റിന്റെ സമീപകാല നേട്ടങ്ങള്ക്കു ചുക്കാന് പിടിച്ചവരില് ഒരാളായ തിലകരത്നെ ദില്ഷന് കളി നിര്ത്തുന്നു. ഓസ്ട്രേലിയയ്ക്കെതിരായ ഏകദിന, ട്വന്റി20 പരമ്പരകള്ക്കു ശേഷം അന്താരാഷ്ട്ര ക്രിക്കറ്റിനോട് വിടപറയുമെന്ന് ദില്ഷന് പ്രഖ്യാപിച്ചു. 2013ല് ടെസ്റ്റ് മതിയാക്കിയിരുന്നു താരം.
സമീപകാലത്തെ മങ്ങിയ ഫോമും പുതിയ തലമുറയ്ക്കു വഴിമാറിക്കൊടുക്കാനുള്ള സമ്മര്ദ്ദവുമാണ് ദില്ഷനെ തീരുമാനത്തിനു പ്രേരിപ്പിച്ചത്. ദാംബുള്ളയിലെ ഞായറാഴ്ചത്തെ ഏകദിനവും, സപ്തംബര് ഒമ്പതിന് കൊളംബോയിലെ ട്വന്റി20യും താരത്തിന്റെ അവസാനത്തേതാകും. ചീഫ് സെലക്റ്റര് സനത് ജയസൂര്യയും നായകന് ഏയ്ഞ്ചലോ മാത്യൂസും ദില്ഷന് ടീമിലുള്ളതില് അത്ര തത്പരരല്ല. 2019 ലോകകപ്പ് ലക്ഷ്യമിട്ട് യുവനിരയെ ഒരുക്കാനാണ് അവരുടെ ശ്രമം. സെലക്റ്റര്മാരുമായുള്ള ചര്ച്ചയ്ക്കു ശേഷമാണ് തീരുമാനം പ്രഖ്യാപിച്ചത്.
ലങ്ക കണ്ട മികച്ച ബാറ്റ്സ്മാന്മാരില് ഒരാളായ ഈ വലംകൈയന് 329 ഏകദിനങ്ങളില് നിന്ന് 39.26 ശരാശരിയില് 11,868 റണ്സ് നേടി. ഉയര്ന്ന സ്കോര് 161 നോട്ടൗട്ട്. 22 സെഞ്ചുറികള്, 47 അര്ധശതകങ്ങള്. ജയസൂര്യ, സംഗക്കാര, ജയവര്ധനെ എന്നിവര്ക്കു ശേഷം 10,000 റണ്സ് തികയ്ക്കുന്ന ലങ്കന് താരമാണ് ദില്ഷന്. പാര്ട്ട് ബൗളറായെത്തുന്ന താരം 106 വിക്കറ്റുകളും നേടി. ട്വന്റി20യില് 78 മത്സരങ്ങളില് 1,561 റണ്സ്. ഉയര്ന്ന സ്കോര് 104. ഏഴു വിക്കറ്റും നേടി. 87 ടെസ്റ്റില് നിന്ന് 8,379 റണ്സ്. 16 സെഞ്ചുറി, 23 അര്ധസെഞ്ചുറി. ഉയര്ന്ന സ്കോര് 193.
ദില്സ്കൂപ്പ് എന്നു വിഖ്യാതമായ ഷോട്ട് ക്രിക്കറ്റിനു പരിചയപ്പെടുത്തിയത് ദില്ഷനാണ്. ക്രിക്കറ്റില്നിന്ന് മൂന്നു ഫോര്മാറ്റിലും ലങ്കയെ നയിച്ച ദില്ഷന്റെ കരിയര് മാറിമറിഞ്ഞത് ബാറ്റിങ് ഓര്ഡറില് സ്ഥാനക്കയറ്റം ലഭിച്ചപ്പോള്. നാലു തവണ കലണ്ടര് വര്ഷത്തില് 1,000 റണ്സ് തികച്ച താരവുമായി ഇദ്ദേഹം. രണതുംഗ യുഗത്തിനു ശേഷം ലങ്കന് ക്രിക്കറ്റിന്റെ പതാകവാഹകരായിരുന്ന ഒരു തലമുറയുടെ അവസാന കണ്ണിയാണ് ദില്ഷന്റെ വിടവാങ്ങലോടെ ലങ്കന് ക്രിക്കറ്റില് അവസാനിക്കുന്നത്.
