റോത്തക്കിലെ ചടങ്ങില് സാക്ഷിക്കൊപ്പം
സെല്ഫിയെടുക്കുന്ന ആരാധകന്
ന്യൂദല്ഹി/ചണ്ഡിഗഢ്: റിയൊ ഒളിമ്പിക്സില് ഇന്ത്യയ്ക്ക് ആദ്യ മെഡല് നേടിത്തന്ന ഗുസ്തി താരം സാക്ഷി മാലിക്കിന് തകര്പ്പന് വരവേല്പ്പ്. ഹരിയാനയില് നടന്ന സ്വീകരണച്ചടങ്ങില് സാക്ഷിക്ക് രണ്ടര കോടി രൂപയുടെ ചെക്കും മുഖ്യമന്ത്രി മനോഹര്ലാല് ഖട്ടര് സമ്മാനിച്ചു.
ഇന്നലെ പുലര്ച്ചെ ന്യൂദല്ഹി വിമാനത്താവളത്തിലിറങ്ങിയ സാക്ഷിയെ ഹരിയാന മന്ത്രിമാരുടെ നേതൃത്വത്തിലാണ് ആരാധകര് സ്വീകരിച്ചത്.
റിയൊയില് സംസ്ഥാനത്തിന്റെ പ്രതിനിധിയായി പോയ കായികമന്ത്രി അനില് വിജും ഒപ്പമുണ്ടായിരുന്നു. ”അഭിമാന നിമിഷം, ഇത്രയും വലിയൊരു സ്വീകരണം പ്രതീക്ഷിച്ചില്ല, മഹത്തായ അനുഭവം” ദല്ഹിയിലെ സ്വീകരണംകണ്ട് സാക്ഷി പ്രതികരിച്ചു.
തുടര്ന്ന് സ്വദേശത്തേക്കു പോയ താരത്തിന് ഝാര് ജില്ലയിലെ ബഹദൂര്ഗഢിലാണ് സംസ്ഥാനം ഔദ്യോഗിക സ്വീകരണമൊരുക്കിയത്.
ഖട്ടറിനു പുറമെ മുതിര്ന്ന മന്ത്രിമാര് ക്യാപ്റ്റന് അഭിമന്യു, ഒ.പി. ധങ്കര് എന്നിവരും സാക്ഷിയുടെ മാതാപിതാക്കളടക്കം ബന്ധുക്കളും ചടങ്ങിനെത്തി. താളമേള വാദ്യങ്ങളോടെയാണ് താരത്തെ നാട് വരവേറ്റത്.
ബേട്ടി പഠാവോ, ബേട്ടി ബച്ചാവോ പദ്ധതിയുടെ സംസ്ഥാനത്തിന്റെ ബ്രാന്ഡ് അംബാസിഡറായി സാക്ഷിയെ ഖട്ടര് പ്രഖ്യാപിച്ചു. ”നമ്മുടെ രണ്ടു പെണ്മക്കള് സാക്ഷിയും സിന്ധുവും രാജ്യത്തിന്റെ യശസുയര്ത്തി.
ബഹദൂര്ഗഢില് നല്കിയ സ്വീകരണത്തില് ഹരിയാന മുഖ്യമന്ത്രി
മനോഹര് ലാല് ഖട്ടര് രണ്ടര കോടി രൂപയുടെ ചെക്ക് സാക്ഷി മാലിക്കിന് സമ്മാനിക്കുന്നു
റെയില്വേയില് ജീവനക്കാരിയായ സാക്ഷിക്ക്, സംസ്ഥാന സര്വീസില് ക്ലാസ് രണ്ട് തസ്തികയില് നിയമനം നല്കും. സാക്ഷിയുടെ ഗ്രാമത്തില് സ്പോര്ട്സ് നഴ്സറിയും സ്റ്റേഡിയവും നിര്മിക്കും”- മുഖ്യമന്ത്രി പറഞ്ഞു.
എല്ലാവരുടെയും പിന്തുണ ഇനിയും ഉണ്ടാകണമെന്നും, എങ്കില് കൂടുതല് മെഡലുകള് രാജ്യത്തിനു സമ്മാനിക്കാനാകുമെന്നും മറുപടി പ്രസംഗത്തില് സാക്ഷി പറഞ്ഞു.
ബേട്ടി പഠാവോ, ബേട്ടി ബച്ചാവോ പദ്ധതിയെ പ്രശംസിച്ച താരം, അതിലേക്ക് ബേട്ടി ഖിലാവോ (പെണ്കുട്ടികളെ കായികരംഗത്തെത്തിക്കണം) എന്നു കൂട്ടിച്ചേര്ക്കണമെന്നും പറഞ്ഞു.
പിന്നീട് സ്വന്തം ഗ്രാമമായ റോത്തക്കിലെ മൊഖ്റ ഖാസിലേക്കു പോയി സാക്ഷി. അവിടെയും സ്വീകരണച്ചടങ്ങുകള് ഒരുക്കിയിരുന്നു. വഴിനീളെ ഗ്രാമീണരുടെ സ്നേഹവായ്പ്പ് ഏറ്റുവാങ്ങിയാണ് സാക്ഷി വീട്ടിലെത്തിയത്.
