പയ്യന്നൂര്: ആയിരകണക്കിന് വിദ്യാര്ഥികള്ക്ക് മെച്ചപ്പെട്ട വിദ്യാഭ്യാസം നല്കുകയും നൂറുകണക്കിന് അധ്യാപകര് ജോലി ചെയ്യുന്നതുമായ അണ് എയ്ഡഡ് വിദ്യാലയങ്ങളുടെ സംരക്ഷണത്തിനായി കണ്ണൂര്, കാസര്കോട് ജില്ലകളിലെ അണ് എയ്ഡഡ് സ്കൂളുകളുടെ കൂട്ടായ്മ നിലവില് വന്നു. പൊതുവിദ്യാലയങ്ങളോടൊപ്പം സ്വകാര്യ മേഖലകളിലെ സ്കൂളുകളെയും സംരക്ഷിക്കുന്നതിനും വളര്ത്തുന്നതിനും നടപടിയുണ്ടാകണമെന്ന ആവശ്യവുമായാണ് കൂട്ടായ്മ രൂപം കൊണ്ടത്. കണ്ണൂര്, കാസര്കോട് ജില്ലാ അണ് എയ്ഡഡ് സ്ക്കൂള് അസോസിയേഷനും രൂപീകരിച്ചു. മാനേജ്മെന്റ്, അധ്യാപക പ്രതിനിധികള് അസോസിയേഷനില് അംഗങ്ങളായിരിക്കും.
ഈ മേഖലയിലെ വിദ്യാഭ്യാസ സ്ഥാപനങ്ങള് നേരിടുന്ന പ്രതിസന്ധികളും പ്രയാസങ്ങളും സര്ക്കാരിനെയും പൊതുസമൂഹത്തെയും ധരിപ്പിക്കുന്നതിനും നീതിക്കായി ശബ്ദമുയര്ത്തുന്നതിനും വേണ്ടിയാണ് സംഘടന പ്രവര്ത്തിക്കുക. അതോടൊപ്പം സ്വന്തം നിലക്ക് പഠന നിലവാരം മെച്ചപ്പെടുത്തുന്നതിനും വിദ്യാര്ത്ഥികളുടെ കലാ, കായിക, ശാസ്ത്ര രംഗങ്ങളിലെ കഴിവുകള് പരിപോഷിപ്പിക്കുന്നതിനും വിദ്യാലയാന്തരീക്ഷം മെച്ചപ്പെടുത്തുന്നതിനും പരീക്ഷ സമ്പ്രദായം ഏകീകരിക്കാനുള്ള നടപടികളും ഉണ്ടാക്കും. സ്കൂള് യുവജനോത്സവത്തിന്റെ മാതൃകയില് കലോത്സവങ്ങളും കായിക മേളകളും ഏറ്റെടുക്കും. മികവ് 16 എന്ന പേരിലുള്ള കൂട്ടായ്മ ഗാന്ധിജയന്തി ദിനമായ ഒക്ടോബര് രണ്ടിന് കണ്ണൂര് ജില്ലയിലെ മാടായിപ്പാറ ശ്രീനാരായണ വിദ്യാലയത്തില് വെച്ച് തുടക്കം കുറിക്കും. പയ്യന്നൂര് എടാട്ട് ശ്രീനാരായണ വിദ്യാലയത്തില് ചേര്ന്ന രൂപീകരണയോഗത്തില് രണ്ടു ജില്ലകളിലെയും 35 ഓളം വിദ്യാലയങ്ങളുടെ പ്രതിനിധികള് പങ്കെടുത്തു.
യോഗത്തില് കെ.ജി.ഗോപാലകൃഷ്ണന് അദ്ധ്യക്ഷത വഹിച്ചു. ഉദിനൂര് സുകുമാരന് പദ്ധതി വിശദീകരിച്ചു. പ്രിന്സിപ്പാള് വി.കെ.നാരായണന് മാസ്റ്റര്, പി.പി.കരുണാകരന് മാസ്റ്റര്, റിട്ട.എഇഒ കെ.വി.നാരായണന്, കെ.വി.ശശി മാസ്റ്റര്, ബി.റഫീഖ്, എം.കെ.രാജീവന്, പി.പി.കൃഷ്ണന്, ടി.പ്രഭാകരന്, സി. രാഘവന്, സനിത ടീച്ചര്, കെ.വി.ഷെനി, രജിത തുടങ്ങിയവര് സംസാരിച്ചു. ഭാരവാഹികളായി ഉദിനൂര് സുകുമാരന് (പ്രസിഡണ്ട് ), പി.കരുണാകരന് മാസ്റ്റര്, കെ.ജി.ഗോപാലകൃഷ്ണന് (വൈസ് പ്രസിഡണ്ട്), വി.കെ.നാരായണന് മാസ്റ്റര് (ജനറല് സെക്രട്ടറി), റിട്ട. എഇഒ കെ.വി.നാരായണന്, കെ.വി.ശശി മാസ്റ്റര് (സെക്രട്ടറിമാര്)എം.കെ.രാജീവന് (ട്രഷറര്) എന്നിവരെ തെരഞ്ഞെടുത്തു.
