ആലപ്പുഴ: ആലപ്പുഴ നിയോജകമണ്ഡലത്തിലെ എല്ലാ വീടുകളിലും വൈദ്യുതിയെത്തിക്കാനുള്ള നടപടികള്ക്കു തുടക്കമായി. സമ്പൂര്ണ വൈദ്യുതീകരണം മൂന്നാംഘട്ടത്തിന്റെ ഭാഗമായി കൂടിയ പ്രവര്ത്തക സമിതി യോഗത്തില് മന്ത്രി ഡോ. റ്റിഎം തോമസ് ഐസക് അദ്ധ്യക്ഷത വഹിച്ചു.
കെ.എസ്ഇബിയുടെ കണക്കുകള് പ്രകാരം മണ്ഡലത്തില് 88 കുടുംബങ്ങള്ക്ക് വൈദ്യുതി ലഭ്യമായിട്ടില്ല. വീട് വയറിങ് ചെയ്തിട്ടില്ലാത്തതിനാല് 53 കുടുംബങ്ങള്ക്കും സമീപവാസികളുടെ സമ്മതപത്രം ലഭിക്കാത്തതിനാല് 13 പേര്ക്കും വൈദ്യുതി ലൈനില്നിന്ന് സുരക്ഷിത അകലം പാലിച്ച് വീട് നിര്മിക്കാത്തതിനാല് ആറു പേര്ക്കും വൈദ്യുതി കണക്ഷന് നല്കിയിട്ടില്ലെന്ന് ഉദ്യോഗസ്ഥര് പറഞ്ഞു. വൈദ്യുതി ലഭിക്കാത്തവരില് 71 കുടുംബങ്ങള് ദാരിദ്ര്യരേഖയ്ക്കു താഴെയുള്ളവരും 11 കുടുംബങ്ങള് പട്ടികജാതി-വര്ഗ വിഭാഗത്തില്പ്പെട്ടവരുമാണ്.
വാര്ഡുതോറുമുള്ള വൈദ്യുതിയില്ലാത്ത കുടുംബങ്ങളുടെ പട്ടിക തയാറാക്കി ഒരാഴ്ചയ്ക്കുള്ളില് നല്കാന് ഗ്രാമപഞ്ചായത്ത് പ്രസിഡന്റുമാര്ക്കും നഗരസഭയ്ക്കും മന്ത്രി നിര്ദേശം നല്കി
അമ്പലപ്പുഴ നിയോജക മണ്ഡലത്തിലെ മുഴുവന് വീടുകളുടെയും വൈദ്യുതീകരണം അടുത്ത മാര്ച്ച് 31നകം പൂര്ത്തിയാക്കുമെന്ന് പൊതുമരാമത്ത്-രജിസ്ട്രേഷന് വകുപ്പുമന്ത്രി ജി. സുധാകരന് പറഞ്ഞു.
ഇതുവരെ നടത്തിയ സര്വേകള് പ്രകാരം 250 ഓളം വീടുകളാണ് ഇനി വൈദ്യുതീകരിക്കാനുള്ളത്. ഇതില് 130 എണ്ണം ബിപിഎല്, എസ്.സി.-എസ്.ടി. വിഭാഗത്തില്പ്പെട്ടവരുടേതാണ്. നഗരസഭയിലെ വാര്ഡുകളും അഞ്ച് പഞ്ചായത്തുകളും ഇതില് വരും. മുഴുവന് വീടുകളും വൈദ്യുതീകരിക്കാനുള്ള തുക കണക്കാക്കുകയും തദ്ദേശ സ്വയംഭരണ സ്ഥാപനങ്ങള് തങ്ങളുടെ വിഹിതം കണ്ടെത്തി നല്കുകയും വേണം. സമ്പൂര്ണ വൈദ്യുതീകരണത്തിനായി ആസ്തി വികസന ഫണ്ടില് നിന്നും 25 ലക്ഷം രൂപവരെ നല്കാമെന്ന് മന്ത്രി പ്രഖ്യാപിച്ചു
