റിയോ ഡി ജനീറോ: വനിതാ പോൾവോൾട്ടിൽ ലോക റെക്കോർഡുകൾ തകർക്കുന്നത് ശീലമാക്കിയ റഷ്യയുടെ യെലേന ഇസിൻബയേവ വിരമിച്ചു.രാജ്യാന്തര ഒളിമ്പിക്സ് കമ്മിറ്റിയുടെ അത്ല്റ്റ് കമ്മീഷനിലേക്ക് തെരഞ്ഞെടുക്കപ്പെട്ടതിന് പിന്നാലെയാണ് വിരമിക്കൽ പ്രഖ്യാപനം. ഒളിമ്പിക്സിൽ റഷ്യൻ താരങ്ങളോട് അന്താരാഷ്ട്ര ഒളിമ്പിക്സ് കമ്മിറ്റി കാണിച്ചത് അനീതിയാണെന്നും വിരമിക്കൽ പ്രഖ്യാപിച്ചുകൊണ്ട് നടത്തിയ വാർത്താ സമ്മേളനത്തിൽ ഇസിൻ പറഞ്ഞു.
ലോകം കണ്ട ഏറ്റവും മികച്ച വനിതാ പോൾവാൾട്ട് താരമായ ഇസിന് രാജ്യാന്തര അത്ലറ്റിക് ഫെഡറേഷൻ റഷ്യൻ ടീമിനെ വിലക്കിയതിനെ തുടർന്ന് ഒളിമ്പിക്സിൽ പങ്കെടുക്കാൻ കഴിഞ്ഞിരുനിനല്ല. ഉത്തേജക ആരോപണത്തെ തുടർന്ന് റഷ്യൻ താരങ്ങൾക്കേർപ്പെടുത്തിയ കൂട്ട വിലക്കാണ് ഇസിന് തിരിച്ചടിയായത്.
താൻ മികച്ച ഫോമിലാണുള്ളതെന്നും തന്റെ അഭാവത്തിൽ ആര് സ്വർണം നേടിയാലും അത് യഥാർത്ഥ വിജയമാകില്ലെന്നും വിരമിക്കൽ പ്രഖ്യാപിച്ചു കൊണ്ട് ഇസിൻബയേവ വ്യക്തമാക്കി. 2004, 2008 ഒളിമ്പിക്സുകളിൽ സ്വർണ്ണവും 2012ൽ വെങ്കലവും നേടിയ ഇസിൻ 2005, 2007 ലോക ചാമ്പ്യൻഷിപ്പുകളിൽ സ്വർണ്ണവും 2003-ൽ വെങ്കലവും നേടി. ലോക ഇൻഡോർ ചാമ്പ്യൻഷിപ്പുകളിൽ നാല് സ്വർണ്ണവും ഒരു വെള്ളിയും. 2004, 06, 08, 2012 ചാമ്പ്യൻഷിപ്പുകൡായിരുന്നു സ്വർണ്ണം. 2003-ൽ ബെർമിങ്ഹാമിൽ വെള്ളിയും.
കൂടാതെ 2006ലെ ലോകകപ്പിൽ സ്വർണ്ണവും 2004, 05, 06, 07, 09 വർഷങ്ങളിലെ ലോക അത്ലറ്റിക്സ് ഫൈനലിലും സ്വർണ്ണനേട്ടം. സീനിയർ തലത്തിന് പുറമെ യൂത്ത്, ജൂനിയർ, വിഭാഗങ്ങളിലും ഇസിൻ ലോക ചാമ്പ്യനായിരുന്നു. ലോകത്താകമാനം ആകെ 8 കായിക താരങ്ങളാണ് ഈ നേട്ടം സ്വന്തമാക്കിയിട്ടുള്ളത്.
കൂടാതെ പോൾവോൾട്ടിൽ അഞ്ച് മീറ്റർ താണ്ടിയ ആദ്യ വനിതയെന്ന ബഹുമതിയും ഇസിന് സ്വന്തം. 2005-ൽ ഇംഗ്ലണ്ടിലായിരുന്നു ഈ നേട്ടം ഇസിൻ സ്വന്തമാക്കിയത്. ഇൻഡോറിനും ഔട്ട് ഡോറിലുമായി 28 തവണയാണ് ഇസിൻ ലോക റെക്കോർഡുകൾ തകർത്തിട്ടുള്ളത്. ഇതോടെയാണ് ലേഡി ബൂബ്ക എന്ന പേരും ഇസിന് സ്വന്തമായത്.
2009 ആഗസ്റ്റിൽ സൂറിച്ചിൽ നടന്ന മത്സരത്തിൽ സ്ഥാപിച്ച 5.06 മീറ്ററാണ് നിലവിലെ ഔട്ട്ഡോർ റെക്കോർഡ്. 2009-ലാണ് ഇൻഡോറിൽ ഇസിൻ ആദ്യമായി 5 മീറ്റർ താണ്ടിയത്. പിന്നീട് മൂന്നുവർഷത്തിനുശേഷം 2012-ൽ 5.01 മീറ്ററും ചാടി. ഇസിന് പുറമെ 5 മീറ്റർ താണ്ടി ഒരേയൊരു വനിതയാണുള്ളത്. അമേരിക്കയുടെ ജെൻ ഷ്ർ. 2013 മാർച്ച് 2ന് ഇസിന്റെ ഇൻഡോർ റെക്കോർഡ് 5.03 മീറ്റർ ചാടി ജെൻ സ്വന്തം പേരിലാക്കുകയും ചെയ്തു.
അന്താരാഷ്ട്ര അത്ലറ്റിക് ഫെഡറേഷന്റെ അത്ലറ്റ് ഓഫ് ദി ഇയർ പുരസ്കാരം 2004, 2005, 2008 വർഷങ്ങളിൽ ഇസിൻബയേവക്കു ലഭിച്ചു. 2007, 09 വർഷങ്ങളിൽ ലോകത്തെ ഏറ്റവും മികച്ച വനിതാ കായികതാരത്തിനുള്ള ലോറസ് പുരസ്കാരവും ഇസിനെ തേടിയെത്തി.
