കൊച്ചി: പനമ്പിള്ളി നഗറിലെ വ്യാപാര സ്ഥാപനങ്ങള് നഗരസഭ അടച്ചു പൂട്ടാന് ശ്രമിച്ചതിനെതിരെ കടകള് അടച്ച് വ്യാപാരികള് പ്രതിഷേധിച്ചു. പനമ്പിള്ളി നഗറില്നിന്നും ആരംഭിച്ച പ്രതിഷേധപ്രകടനം കോര്പ്പറേഷന് ഓഫീസിനുമുന്നില് സമാപിച്ചു.
ധര്ണ്ണ കോര്പ്പറേഷന് പ്രതിപക്ഷ നേതാവ് കെ.ജെ.ആന്റണി ഉദ്ഘാടനം ചെയ്തു. വ്യാപാരി വ്യവസായി സമിതി, സ്പെയ്സ് എന്ന സംഘടനയുടെ ആഭിമുഖ്യത്തിലായിരുന്നു ധര്ണ. വ്യാപാരികള് രാവിലെ 10 മുതല് 2വരെ കടകള് അടച്ചു.
പനമ്പിള്ളി നഗറില് പാര്പ്പിട മേഖലയിലെ വ്യാപാരസ്ഥാപനങ്ങള് അടച്ചുപൂട്ടാനാണ് നഗരസഭയുടെ നിര്ദ്ദേശം. ലൈസന്സില്ലാതെ പ്രവര്ത്തിക്കുന്ന 100 ഓളം കടകള്ക്കെതിരെയാണ് നടപടി. ലക്ഷങ്ങള് മുടക്കി തങ്ങള് നടത്തുന്ന സ്ഥാപനങ്ങള് പൂട്ടാന് അനുവദിക്കില്ലെന്ന നിലപാടിലാണ് വ്യാപാരികള്.
ഒഴിപ്പിക്കലിനെതിരെ വ്യാപാരികള് കോടതിയില് നല്കിയ ഹര്ജ്ജി നാളെ പരിഗണക്കാനിരിക്കെ നഗരസഭയുടെ ധൃതി പിടിച്ച നടപടി ശരിയല്ലെന്നാണ് വ്യാപാരികളുടെ വാദം.
വെള്ളിയാഴ്ച നഗരസഭ മാറി സീലുചെയ്ത അഞ്ച് സ്ഥാപനങ്ങള് തിങ്കളാഴ്ച തുറന്നുകൊടുക്കുമെന്ന് കോര്പ്പറേഷന് സെക്രട്ടറി അറിയിച്ചു.
