മാരാരിക്കുളം ബീച്ചില് വിനോദസഞ്ചാരികള്ക്ക്
ഭീഷണിയായ നായകള്
ആലപ്പുഴ: നഗര ഗ്രാമ വ്യത്യാസമില്ലാതെ തെരുവ് നായ്ക്കളുടെ കടിയേല്ക്കുന്നവരുടെയും എണ്ണം പെരുകുന്നു. നായ്ക്കളെ നിയന്ത്രിക്കാന് നടപടികളില്ല. തെരുവ് നായക്കള് പലയിടത്തും ജനജീവിതത്തിന് ഭീഷണിയാകുമ്പോള് തദ്ദേശ സ്വയംഭരണ സ്ഥാപനങ്ങള് നോക്കുകുത്തികളാകുന്നു. മാംസ- മത്സ്യ അവശിഷ്ടങ്ങള് പാതയോരങ്ങളില് തള്ളുന്നതാണ് നായശല്യം വര്ദ്ധിക്കാന് പ്രധാന കാരണം. വന്കിട കോഴിഫാം, അറവുശാലകള് എന്നിവിടങ്ങളില് നിന്നുപോലും രാത്രിയുടെ മറവില് അവശിഷ്ടങ്ങള് തള്ളുകയാണ്. ഇതു തടയാന് തദ്ദേശ സ്ഥാപനങ്ങള്ക്കോ പോലീസിനോ കഴിയുന്നില്ല. രാപ്പകല് ഭേദമന്യെ ഇരുചക്രവാഹന യാത്രക്കാരും കാല്നടയാത്രക്കാരും നായശല്യം മൂലം ബുദ്ധിമുട്ടുകയാണ്. സ്കൂളുകളില് കുട്ടികള്ക്കുപോലും പട്ടികളെ പേടിച്ച് പോകാന് വയ്യാത്ത അവസ്ഥയാണ്.
വിവിധ നഗരസഭകളില് തെരുവ് നായ്ക്കളെ നിയന്ത്രിക്കുന്നതിന് നടപടികള് ആവിഷ്ക്കരിച്ചിരുന്നെങ്കിലും നടപ്പാക്കാന് കഴിഞ്ഞിട്ടില്ല. അലഞ്ഞുതിരിയുന്ന തെരുവുനായ്ക്കളെ പിടിക്കാനോ പിടിച്ചവയെ വന്ധ്യംകരണം നടത്തി പാര്പ്പിക്കാനോ സൗകര്യങ്ങളില്ലാത്തതാണ് പ്രധാന പ്രശ്നം.
തെരുവുനായ്ക്കളെ നിയന്ത്രിക്കുന്നതിനും ഇവയുടെ വ്യാപനം തടയുന്നതിനും ആവശ്യമായ നടപടികള് തദ്ദേശസ്വയം ഭരണ വകുപ്പുകളും ബന്ധപ്പെട്ട ഉദ്യോഗസ്ഥരും സ്വീകരിക്കണമെന്ന് നാട്ടുകാര് നിരന്തരമായി ആവശ്യപ്പെടുന്നുണ്ട്്. നായ്ക്കളുടെ കടിയേല്ക്കുന്നവര്ക്ക് മതിയായ വൈദ്യസഹായവും സാമ്പത്തിക സഹായവും നല്കാത്തതും പൊതുജനങ്ങളില് വന് പ്രതിഷേധത്തിന് ഇടയാക്കിയിട്ടുണ്ട്.
എല്ലാ ബജറ്റുകളിലും നായ്ക്കളെ നിയന്ത്രിക്കുന്നതിന് ഫണ്ട് വകമാറ്റി വയ്ക്കാറുണ്ടെങ്കിലും തുടര്നടപടികള് ഉണ്ടാകാറില്ല. കെഎസ്ആര്ടിസി സ്റ്റാന്ഡ്, റെയില്വേ സ്റ്റേഷനുകള് ബസ് സ്റ്റോപ്പുകള് തുടങ്ങി ആളുകള് കൂടുന്നയിടങ്ങളിലെല്ലാം തന്നെ നായശല്യം രൂക്ഷമാണ്. ഇതുകൂടാതെ വീടുകളില് കയറി വളര്ത്തുമൃഗങ്ങളെ നായ്ക്കള് കടിച്ചുകൊല്ലുന്ന സംഭവവും പതിവായിരിക്കുകയാണ്.
ആലപ്പുഴയിലെ ടൂറിസം രംഗത്തെ പോലും നായശല്യം ബാധിക്കുന്ന അവസ്ഥയാണുള്ളത്. വിനോദസഞ്ചാരികള് കൂടുതലായെത്തുന്ന പുന്നമട, ആലപ്പുഴ ബീച്ച് എന്നവിടങ്ങളിലും നായ്ക്കള് സൈ്വര്യ വിഹാരം നടത്തുകയാണ്.
പലപ്പോഴും പട്ടികടിയേറ്റ് എത്തുന്നവര്ക്ക് മതിയായ ചികിത്സാ സൗകര്യം ആലപ്പുഴയിലെ ബഹുഭൂരിപക്ഷം ആശുപത്രികളിലുമില്ല. ആലപ്പുഴ മെഡിക്കല് കോളേജ് ആശുപത്രിയിലാണ് പട്ടികടിയേറ്റ് എത്തുന്നവര്ക്ക് പ്രധാനമായും ചികിത്സ ലഭിക്കുന്നത്.
ഇവിടെ പലപ്പോഴും ആന്റി റാബീസ് വാക്സിന് ഉണ്ടാകാറില്ല. പുറത്തുനിന്നും വന് വില നല്കി മരുന്നു വാങ്ങി നല്കേണ്ട ഗതികേടിലാണ് പട്ടികടിയേറ്റ് എത്തുന്ന നിര്ദ്ധനരായവര്.
