ചെറുതോണി: മരിയാപുരം പഞ്ചായത്തില് മാടവനക്കാനത്ത് പ്രവര്ത്തിച്ചുവരുന്ന പാറമടയുടെയും ക്രഷര് യൂണിറ്റിന്റെയും പ്രവര്ത്തനം പ്രദേശവാസികളുടെ ജീവനും സ്വത്തിനും ഭീഷണിയാകുന്നു. ഉഗ്രസ്ഫോടനത്തോടെയുള്ള പാറപൊട്ടിക്കല്മൂലം പരിസരവാസികളുടെ വീടുകള്ക്ക് കേടുപാടുകള് സംഭവിച്ചു കഴിഞ്ഞു. ഇവിടെ നിന്നും പുറന്തള്ളുന്ന മലിന ജലവും പൊടിപടലങ്ങളും മൂലം പരിസരങ്ങളിലുള്ള കുടിവെള്ളംവരെ മലിനമാക്കിയിരിക്കുകയാണ്. ഇടുക്കി ജില്ലാ കളക്ടര്ക്ക് പ്രദേശവാസികള് പരാതി നല്കുകയും,
തങ്കമണി വില്ലേജ് ഓഫീസര് സ്ഥലം പരിശോധിച്ച് പരാതിക്കാര് പറയുന്നത് ശരി എന്ന് റിപ്പോര്ട്ട് എഴുതിപോയിട്ടും നാളിതുവരെ യാതൊരു നടപടിയും ഉദ്യോഗസ്ഥന്മാരുടെ ഭാഗത്തുനിന്നും ഉണ്ടായിട്ടില്ല. വിവരാവകാശപ്രകാരമാണ് ഈ റിപ്പോര്ട്ട് പരാതിക്കാര് നേടിയെടുത്തത്. ഇതുമായി വീണ്ടും കളക്ടറെ സമീപിച്ചപ്പോള് ഓഗസ്റ്റ് 10-ാം തീയതിക്കകം തീരുമാനം ഉണ്ടാകും എന്ന ഉറപ്പാണ് കിട്ടിയതെങ്കിലും ഇതും പാലിക്കപ്പെട്ടിട്ടില്ല. ഇടുക്കി ഡാമിന്റെ സമീപപ്രദേശത്ത് പ്രവര്ത്തിക്കുന്ന ഈ ക്വോറി അനുവദിച്ചിട്ടുള്ളതില് കൂടുതല് പാറകളാണ് ദിവസവും പാറപൊട്ടിച്ച് നീക്കുന്നതെന്നും പരാതിക്കാര് പറയുന്നു. കാലവര്ഷത്തില് പെയ്യുന്ന മഴയെയും ഉഗ്രസ്ഫോടനത്തോടുള്ള പാറപൊട്ടിക്കല് എന്ന് അവസാനിപ്പിച്ച് ഞങ്ങളുടെ ജീവിതം സ്വര്യവും, സുരക്ഷിതവുമാക്കിതരും എന്ന് കാത്തിരിക്കുകയാണ് സമീപവാസികളായ വീട്ടുകാര്.
