ഡോ.വിപി ജോയിയെ ഡപ്യൂട്ടി ജി.എം ശ്രീദാസ് സ്വീകരിക്കുന്നു
പദ്ധതികള് അനന്തമായി നീളുന്നത് കേരളത്തിന്റെ വികസനം മുരടിപ്പിക്കുകയാണെന്ന് കേന്ദ്ര പിഎഫ് കമ്മീഷണര് വി.പി. ജോയ്. ഗതാഗത രംഗത്തെ വികസനം എന്ന വിഷയത്തില് സംസാരിക്കുകയായിരുന്നു അദ്ദേഹം. പ്രകൃതി വാതക പൈപ്പ്ലൈന് പദ്ധതി എട്ട് വര്ഷം കഴിഞ്ഞിട്ടും യാഥാര്ത്ഥ്യമാക്കാന് കേരളത്തിന് കഴിഞ്ഞില്ല.
മറ്റ് പല സംസ്ഥാനങ്ങളിലും പദ്ധതി നടപ്പായി. വ്യവസായ മേഖലയ്ക്ക് മാത്രമല്ല, ഗതാഗത മേഖലയ്ക്കും പദ്ധതി ഏറെ ഗുണകരമായിരുന്നു. വായുമലിനീകരണം കുറയ്ക്കാനും ഹരിതവാതകത്തിന്റെ ഉപയോഗം വഴിവെക്കുമായിരുന്നു. എന്നാല് ചില നിക്ഷിപ്ത താത്പര്യക്കാരുടെ എതിര്പ്പിനെത്തുടര്ന്ന് പദ്ധതി നടപ്പാക്കാന് കഴിയുന്നില്ല. ഏതാനും വ്യക്തികള്ക്കോ ഒരു വ്യക്തിക്കോ പൊതുസമൂഹത്തിന് ഗുണകരമാകുന്ന പദ്ധതി തടയാന് കഴിയുന്നു. ആശയങ്ങളുടെ കുറവല്ല, പ്രാവര്ത്തികമാക്കുന്നതിലെ കാലതാമസമാണ് കേരളം അഭിമുഖീകരിക്കുന്ന പ്രശ്നം.
വര്ഷങ്ങള്ക്കുശേഷം ഒരു പദ്ധതി യാഥാര്ത്ഥ്യമാക്കിയിട്ട് കാര്യമില്ല.
റോഡ് അപകടങ്ങളില് മുന്പന്തിയിലാണ് കേരളം. ആയിരക്കണക്കിന് ജീവനുകള് റോഡില് പൊലിയുന്നു. വീതികുറഞ്ഞ റോഡുകളാണ് കാരണം. സ്ഥലമേറ്റെടുപ്പാണ് ഏറ്റവും വലിയ പ്രശ്നം. റെയില്വേ പാത ഇരട്ടിപ്പിക്കലിനും ഭൂമിയാണ് തടസ്സം. ഇത് എങ്ങനെ മറികടക്കാനാകുമെന്ന് ഗൗരവമായി ചിന്തിക്കണം. മൊബിലിറ്റി ഹബ്ബുകള് കൂടുതലായി നിര്മ്മിക്കണം. ഹൈ സ്പീഡ് റെയില് കോറിഡോര് കേരളത്തിന്റെ പൊതുഗതാഗത സംവിധാനത്തിന്റെ മുഖഛായ മാറ്റും.
