കണ്ണൂര്: ഭാരതത്തിന്റെ ഏഴുപതാം സ്വാതന്ത്ര്യദിനം കൊണ്ടാടുന്ന ഈ വേളയിലും രാജ്യത്തെ അസ്ഥിരപ്പെടുത്താനുള്ള ദേശവിരുദ്ധരുടെ ശ്രമം ദേശഭക്തിയുള്ള ജനം തിരിച്ചറിയണമെന്ന് ബിജെപി സംസ്ഥാന സെല് കോ-ഓര്ഡിനേറ്റര് കെ.രഞ്ചിത്ത് പറഞ്ഞു. സ്വാതന്ത്ര്യസമരകാലത്ത് മതത്തിന്റെ പേരില് ഭാരതത്തെ വെട്ടിമുറിക്കാന് ആവശ്യപ്പെട്ട ശക്തികള് വിഭജനത്തിനു ശേഷവും രാജ്യത്തെ അസ്ഥിരപ്പെടുത്താനുള്ള ശ്രമം തുടരുകയാണ്. രാജ്യത്തിന്റെ ഐക്യവും അഖണ്ഡതയും സംരക്ഷിക്കാന് ദേശസ്നേഹികള് കരുതലോടെ ഇരിക്കണമെന്നും അദ്ദേഹം പറഞ്ഞു. യുവമോര്ച്ച അഴീക്കോട്-കണ്ണൂര് നിയോജക മണ്ഡലം കമ്മറ്റികളുടെ ആഭിമുഖ്യത്തില് പയ്യാമ്പലം ബീച്ചില് അഖണ്ഡഭാരത സ്മൃതിദിനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
യുവമോര്ച്ച സംസ്ഥാന ഉപാധ്യക്ഷന് ബിജു ഏളക്കുഴി മുഖ്യപ്രഭാഷണം നടത്തി. സംസ്ഥാന സമിതിയംഗം റിത്തേഷ്, ബിജെപി ജില്ലാ ഉപാധ്യക്ഷന് കെ.രാധാകൃഷ്ണന്, ട്രഷറര് എ.ഒ.രാമചന്ദ്രന് തുടങ്ങിയവര് സംസാരിച്ചു. ബിജെപി സംസ്ഥാന സെല് മെമ്പര്മാരായ പി.വിനീഷ് ബാബു, ആര്.കെ.ഗിരിധരന്, ബിനില് കണ്ണൂര് തുടങ്ങിയവര് നേതൃത്വം നല്കി. യുവമോര്ച്ച ജില്ലാ ജനറല് സെക്രട്ടറി സി.സി.രതീഷ് അധ്യക്ഷത വഹിച്ചു. എം.അര്ജ്ജുന് സ്വാഗതവും സച്ചിന് പി രാജ് നന്ദിയും പറഞ്ഞു.
