കോഴിക്കോട്: തിരുവണ്ണൂരിലെ മലബാര് സ്പിന്നിംഗ് ആന്റ് വീവിംഗ് മില്സ് തൊഴിലാളികള്ക്ക് ശമ്പളമില്ല. ശമ്പളം വൈകുന്നതില് പ്രതിഷേധിച്ച് ജനറല്മാനേജര് അബ്ബാസിനെ ഉപരോധിച്ച തൊഴിലാളികളെ പന്നിയങ്കര പോലീസ് അറസ്റ്റ്ചെയ്തു. ഇന്നലെ വൈകീട്ട് മൂന്നര മണിക്കാണ് തൊഴിലാളികള് ഉപരോധം ആരംഭിച്ചത്. ഏഴര മണിയോടെ തൊഴിലാളി നേതാക്കളെ പന്നിയങ്കര പോലീസ് അറസ്റ്റ്ചെയ്തു. ശമ്പളം ലഭിക്കുന്നതുവരെ സമരം തുടരുമെന്ന് സംയുക്ത ട്രേഡ് യൂണിയന് നേതാക്കള് പറഞ്ഞു. ബിഎംഎസ്, ഐഎന്ടിയുസി, സിഐടിയു സംഘടനകള് സംയുക്തമായാണ് ജനറല്മാനേജരുടെ ഓഫീസ് ഉപരോധിച്ചത്. കഴിഞ്ഞ മൂന്ന് മാസമായി ശമ്പളം വൈകുകയാണെന്ന് തൊഴിലാളികള് പറഞ്ഞു. പത്താംതിയ്യതി ആയിട്ടും ഈ മാസത്തെ ശമ്പളം നല്കിയിട്ടില്ല. കഴിഞ്ഞമാസം 21നാണ് ശമ്പളം നല്കിയത്. കഴിഞ്ഞ ഒന്നരയാഴ്ചയായി കമ്പനിയില് പ്രവര്ത്തനം നിലച്ച മട്ടാണ്. പ്രവര്ത്തനത്തിനാവശ്യമായ പരുത്തി ലഭിക്കാത്തതാണ് പണിമുടങ്ങാന് കാരണം. മഹാരാഷ്ട്രയില് നിന്നാണ് പരുത്തിവരുന്നത്. പണം നല്കാത്തതുകാരണമാണ് പരുത്തിയുടെ വരവ് നിലച്ചത്.
വൈദ്യുതി ചാര്ജ്ജിനത്തില് ഏതാണ്ട് രണ്ട് കോടി യോളം രൂപ വൈദ്യുതിവകുപ്പിന് അടയ്ക്കാന് ബാക്കിയാണെന്നും ഇഎസ്ഐയും പിഎഫും മുടങ്ങിയിരിക്കുകയാണെന്നും തൊഴിലാളികള് പറഞ്ഞു. സമരത്തിന് കെ.കെ.മോഹനന്, ആര്. പുഷ്പരാജ്(ബിഎംഎസ്), എം. ജയന്, കെ.സി.സുരേഷ്(ഐഎന്ടിയുസി), എം.ജയരാജ്, എംസുധാകരന്(സിഐടിയു) എന്നിവര് നേതൃത്വം നല്കി.
