തിരുവനന്തപുരം: ഈ ഓണത്തിന് നമ്മുടെ വീടുകളില് വിഷരഹിത സദ്യയൊരുക്കാനായി കനകക്കുന്നില് ജൈവമേള ഒരുങ്ങുന്നു. പഴങ്ങളും പച്ചക്കറികളും പൂക്കളും നിറയുന്ന കാര്ഷികോത്സവവും ഓണം മേളയും ആഗസ്റ്റ് 12 മുതല് കനകക്കുന്ന് സൂര്യകാന്തി ഗ്രൗണ്ടില് അരങ്ങേറും.’’ചിങ്ങനിലാവ്’ എന്ന് പേരിട്ടിരിക്കുന്ന പരിപാടി കുടപ്പനക്കുന്ന് കാര്ഷിക കര്മ്മ സേനയും മലങ്കര സോഷ്യല് സര്വീസ് സൊസൈറ്റിയും ചേര്ന്നാണ് സംഘടിപ്പിക്കുന്നത്. പരിപാടിയുടെ പ്രചരണോദ്ഘാടനം കടപ്പനക്കുന്ന് കാര്ഷിക കര്മ്മ സേന ഓഫീസില് ഗായകന് എം.ജി ശ്രീകുമാര് നിര്വഹിച്ചു.
വിഷരഹിത പച്ചക്കറികള്ക്ക് പുറമേ വിവിധ കാര്ഷികോല്പന്നങ്ങളുടെ പ്രദര്ശനവും വിപണനവും മേളയിലുണ്ട്. ജൈവ കര്ഷകര് ഉദ്പാദിപ്പിക്കുന്ന നാടന് പച്ചക്കറികള്, കിഴങ്ങുകള്, തേന്, കായ്കറികള് എന്നിവ മേളയില് നിന്നു വാങ്ങാം. അലങ്കാര വര്ണ്ണമത്സ്യങ്ങളുടേയും പുഷ്പഫല സസ്യങ്ങളുടേയും പ്രദര്ശനവും വിപണനവും ഉണ്ടാകും. ഔഷധ സസ്യങ്ങള് തുടങ്ങി ബോണ്സായി, റമ്പുട്ടാന് വരെ അപൂര്വ ഇനം ചെടികള് മേളയിലെത്തുന്നു.
പായസ മേള, നാടന് ഭക്ഷ്യമേള, ചക്ക കൊണ്ടുള്ള വിഭവങ്ങള് തുടങ്ങി വിപുലമായ ഫുഡ്കോര്ട്ടും സംസ്കരിച്ച പഴം -പച്ചക്കറി വില്പനയും ഇതിനോടനുബന്ധിച്ച് ഒരുങ്ങുന്നു
ഈ ഓണത്തിന് ഒരു കുടുംബത്തിനാവശ്യമായ എല്ലാം ഒരു കുടക്കീഴില് അണിനിരത്തി ഓണം ട്രേഡ് ഫെയറും ഡിസ്കൗണ്ട് മേളയും ഇതോടൊപ്പമുണ്ട്. വിവിധയിനം തുണിത്തരങ്ങള്, റെഡിമെയ്ഡുകള്, ഗൃഹോപകരണങ്ങള്, സൗന്ദര്യവസ്തുക്കള്, ലൈഫ് സ്റ്റൈല് വസ്തുക്കള് തുടങ്ങി എന്തും മേളയില് നിന്ന് സ്വന്തമാക്കാം.
പ്രദര്ശനത്തിന് അനുയോജ്യമായ കാര്ഷികോല്പന്നങ്ങള്, സസ്യങ്ങള് എന്നിവയുമായി പൊതുജനങ്ങള്ക്കും മേളയുടെ ഭാഗമാകാം. തെരഞ്ഞെടുക്കുന്ന ഇനങ്ങള്ക്ക് സമ്മാനവുമുണ്ട്. മേള സന്ദര്ശിക്കാനെത്തുന്നവരില് നിന്ന് തെരഞ്ഞെടുപ്പിലൂടെ രണ്ടായിരത്തോളം പേര്ക്ക് സൗജന്യ പച്ചക്കറിതൈകളും വിത്തുകളും നല്കുന്നു. നറുക്കെടുപ്പിലൂടെ അഞ്ചു കുടുംബങ്ങള്ക്ക് സൗജന്യ പച്ചക്കറിത്തോട്ടവും ഒരുക്കി നല്കുന്നു. സപ്തംബര് 4ന് മേള സമാപിക്കും. കൂടുതല് വിവരങ്ങള്ക്ക് 9847010666,9447005998.
