കണ്ണൂര്: ഭരണമേഖലയിലെ മികച്ച നേട്ടങ്ങള്ക്കുള്ള സ്കോച്ച് ഓര്ഡര് ഓഫ് മെറിറ്റ് പുരസ്കാരം കണ്ണൂര് ജില്ലയ്ക്ക്. ജില്ലാ കലക്ടര് പി.ബാലകിരണിന്റെ നേതൃത്വത്തില് നടപ്പാക്കിയ ബാരിയര് ഫ്രീ കണ്ണൂര്, മിഷന് മാന്ഗ്രോവ്സ് എന്നീ രണ്ട് നൂതന പദ്ധതികളുടെ പേരിലാണ് പുരസ്കാരം. ഡല്ഹിയില് നടന്ന ഇവാല്വേഷനില് സബ് കലക്ടര് നവജോത് ഖോസയാണ് ജില്ലയുടെ പദ്ധതികള് അവതരിപ്പിച്ചത്. സെപ്തംബര് 8, 9 തീയതികളില് ഹൈദരാബാദ് ഹൈടെക് സിറ്റിയില് നടക്കുന്ന 45 ാമത് സ്കോച്ച് സമ്മേളനത്തില് അവാര്ഡ് വിതരണം ചെയ്യും.
സ്കോച്ച് സ്മാര്ട്ട് സിറ്റി അവാര്ഡ്, സ്കോച്ച് സ്വച്ഛ് ഭാരത് അവാര്ഡ് എന്നിവയ്ക്കായുള്ള മത്സരത്തിലേക്കും രണ്ട് പദ്ധതികളും തെരഞ്ഞെടുക്കപ്പെട്ടിട്ടുണ്ട്. ജില്ലാ കലക്ടര് പി ബാലകിരണ്, സബ് കലക്ടര് നവജോത് ഖോസ എന്നിവരോടൊപ്പം ഡിവിഷണല് ഫോറസ്റ്റ് ഓഫീസ്, ജില്ലാ നിര്മിതി കേന്ദ്ര, പിഡബ്ല്യുഡി ബില്ഡിങ്സ്, എല്എസ്ജിഡി എന്ജിനീയറിങ് വിഭാഗം എന്നിവയുടെ പ്രതിനിധികളും സമ്മേളനത്തില് പങ്കെടുക്കും.
സോഷ്യോ ഇക്കണോമിക് മേഖലയിലെ വിവിധ വിഷയങ്ങളും എല്ലാവരെയും ഉള്ക്കൊള്ളുന്ന വളര്ച്ചാപദ്ധതികളുമായി ബന്ധപ്പെട്ട് സമീര് കൊച്ചാറിന്റെ നേതൃത്വത്തില് ഗുഡ്ഗാവ് ആസ്ഥാനമായി പ്രവര്ത്തിക്കുന്ന സംഘടനയാണ് സ്കോച്ച് ഗ്രൂപ്പ്.
ശാരീരികമായി വെല്ലുവിളികള് നേരിടുന്ന വ്യക്തികള്ക്കും ജില്ലയിലെ വിവിധ സര്ക്കാര് സ്ഥാപനങ്ങളില് വിഷമമില്ലാതെ കയറിച്ചെല്ലാന് കഴിയുന്നതിനുള്ള സൗകര്യമൊരുക്കുകയാണ് ബാരിയര് ഫ്രീ കണ്ണൂര് പദ്ധതിയിലൂടെ പ്രാഥമികമായി ലക്ഷ്യമിട്ടത്. പദ്ധതി നടപ്പിലാക്കിയതിലൂടെ കണ്ണൂര് സമ്പൂര്ണ വികലാംഗസൗഹൃദ ജില്ലയായി പ്രഖ്യാപിക്കപ്പെട്ടു. പദ്ധതിയുടെ ഭാഗമായി ജില്ലയിലെ വിവിധ സര്ക്കാര് സ്ഥാപനങ്ങളില് വീല് ചെയറുകള്, റാമ്പുകള്, ലിഫ്റ്റുകള്, കാഴ്ചശക്തിയുമായി ബന്ധപ്പെട്ട പ്രശ്നങ്ങളുള്ളവര്ക്കായി പ്രത്യേക നടപ്പാത, ശാരീരിക വെല്ലുവിളികള് നേരിടുന്നവര്ക്കു കൂടി ഉപയോഗിക്കാവുന്ന തരത്തില് പ്രത്യേക സംവിധാനങ്ങളോടു കൂടിയ ശുചിമുറികള്, വിശ്രമമുറികള് തുടങ്ങിയവ സ്ഥാപിക്കപ്പെട്ടു. തെരഞ്ഞെടുപ്പുമായി ബന്ധപ്പെട്ട് പോളിങ് ബൂത്തുകളിലും ഇത്തരത്തിലുള്ള സഹായക സംവിധാനങ്ങള് ഒരുക്കിയിരുന്നു.
ജില്ലയുടെ അമൂല്യസമ്പത്തായ കണ്ടല്ക്കാടുകളുടെ സര്വേ നടത്തി കൃത്യമായ മാപ്പ് തയ്യാറാക്കി സംരക്ഷണ നടപടികള് ആവിഷ്കരിക്കുന്നതിനാണ് വനം, റവന്യൂ വകുപ്പുകളുടെ കൂട്ടായ പങ്കാളിത്തത്തോടെ മിഷന് മാന്ഗ്രോവ്സ് പദ്ധതി ആവിഷ്കരിച്ച് നടപ്പാക്കിയത്. ജില്ലയിലെ രണ്ടായിരം ഏക്കറോളം വരുന്ന കണ്ടല് വനപ്രദേശങ്ങളുടെ കൃത്യമായ സര്വേ രേഖകള് തയ്യാറാക്കി പ്രസിദ്ധീകരിക്കാനും 600 ഏക്കറോളം ഭൂമി ആദ്യമായി കണ്ടല് റിസര്വ് വനമായി നോട്ടിഫൈ ചെയ്യാനും പദ്ധതിയിലൂടെ കഴിഞ്ഞു. കണ്ടല്വനങ്ങളുടെ സംരക്ഷണത്തിനും ബോധവല്ക്കരണ,ഗവേഷണ പ്രവര്ത്തനങ്ങള്ക്കുമായി പൊതുജന പങ്കാളിത്തത്തോടെയുള്ള പ്രവര്ത്തനങ്ങള്ക്ക് തുടക്കമിട്ട പദ്ധതി രാജ്യവ്യാപകമായ ശ്രദ്ധ നേടിയിരുന്നു.
