ധര്‍മ്മടം: ബ്രണ്ണന്‍ കോളേജ് ശതോത്തര ജൂബിലി സമാപനം ഉദ്ഘാടനം 8 ന് മുഖ്യമന്ത്രി നിര്‍വഹിക്കും. സമാപന സമ്മേളനത്തിനുള്ള ഒരുക്കങ്ങള്‍ ബ്രണ്ണന്‍ കോളേജില്‍ പൂര്‍ത്തിയാവുന്നു. വിദ്യാഭ്യാസമന്ത്രി പ്രൊഫ.സി.രവീന്ദ്രനാഥിന്റെ അധ്യക്ഷതയില്‍ചേരുന്ന സമാപന സമ്മേളനത്തില്‍ സാംസ്‌കാരിക നിയമവകുപ്പ് മന്ത്രിയും പൂര്‍വവിദ്യാര്‍ത്ഥിയുമായ എ.കെ.ബാലന്‍ നവീകരിച്ച ഓഡിറ്റോറിയം ഉദ്ഘാടനം ചെയ്യും. പ്രോഗ്രാം കമ്മിറ്റി ചെയര്‍മാന്‍ എ.എന്‍.ഷംസീര്‍ എംഎല്‍എയുടെ അധ്യക്ഷതയില്‍ ചേര്‍ന്ന പ്രോഗ്രാം കമ്മിറ്റി പരിപാടിക്ക് അന്തിമ രൂപം നല്‍കി.
1968 ല്‍ പണികഴിപ്പിച്ച കോളേജ് ഓഡിറ്റോറിയം ശബ്ദപ്രതിധ്വനി കാരണം ഉപയോഗിക്കാതെ കിടക്കുകയായിരുന്നു. പ്ലാന്‍ ഫണ്ട്, സിഡിസി, പിടിഎ ഫണ്ടുകള്‍ സമാഹരിച്ച് 70 ലക്ഷത്തോളം രൂപ ചെലവഴിച്ചാണ് ഏഴായിരം ചതുരശ്രഅടി വിസ്തീര്‍ണ്ണമുള്ള ഓഡിറ്റോറിയം നവീകരിക്കുന്നത്. പൊതുമരാമത്ത് വകുപ്പിന്റെ മേല്‍നോട്ടത്തില്‍ ബില്‍ഡിങ്, ഇലക്ട്രിക്കല്‍, ഇലക്‌ട്രോണിക്‌സ് വിഭാഗങ്ങള്‍ ഏകോപിച്ചുകൊണ്ടാണ് അക്കോസ്റ്റിക്ക്‌സംവിധാനം ഏര്‍പ്പെടുത്തി ഓഡിറ്റോറിയം നവീകരണ പ്രവൃത്തി പുരോഗമിക്കുന്നത്.
എം.പിമാരായ പി.കെ.ശ്രീമതി, മുല്ലപ്പള്ളി രാമചന്ദ്രന്‍, പ്രൊഫ. റിച്ചാര്‍ഡ്‌ഹേ, ഇ.അഹമ്മദ്, കെ.കെ.രാഗേഷ് എന്നിവര്‍ ചടങ്ങില്‍ പങ്കെടുക്കും. സംഘാടകസമിതി ചെയര്‍മാന്‍ മുന്‍ എംഎല്‍എ കെ.കെ.നാരായണനും റിട്ട.പ്രിന്‍സിപ്പാള്‍ ഡോ. പി.എം.ഇസ്മയിലിനും ഉപഹാരങ്ങള്‍ നല്‍കും. ജില്ലാപഞ്ചായത്ത് പ്രസിഡണ്ട് കെ.വി.സുമേഷ്, ഗ്രാമപഞ്ചായത്ത് പ്രസിഡണ്ട് ബേബിസരോജം തുടങ്ങിയ ജനപ്രതിനിധികളും ചടങ്ങിലുണ്ടാവും.
മുഖ്യമന്ത്രിക്ക് കോളേജ് എന്‍സിസി ഗാര്‍ഡ്ഓഫ് ഓണര്‍ നല്‍കും. നടിയും സര്‍വകലാശാല നൃത്തപ്രതിഭയുമായ പി.അനശ്വരയും സംഘവും അവതരിപ്പിക്കുന്ന ബ്രണ്ണന്‍ ജൂബിലിഗീതത്തിന്റെ നൃത്താവിഷ്‌കാരം ഉള്‍പ്പെടെ വിദ്യാര്‍ത്ഥികളുടെ കലാപരിപാടികളുണ്ടാവും. കലാഭവന്‍ മണിക്ക് ആദരമര്‍പ്പിച്ചുകൊണ്ട് വയനാട് ‘ഗോത്രമുഖി’ അവതരിപ്പിക്കുന്ന നാടന്‍പാട്ട്‌മേള ഉദ്ഘാടന ചടങ്ങിന് ശേഷം അവതരിപ്പിക്കും. പൂര്‍വവിദ്യാര്‍ത്ഥികളും മുന്‍അധ്യാപകരും ജീവനക്കാരും രക്ഷിതാക്കളും നാട്ടുകാരും സമാപനസമ്മേളനത്തില്‍ പങ്കെടുക്കണമെന്ന് പ്രിന്‍സിപ്പാള്‍ അഭ്യര്‍ത്ഥിച്ചു.
