ആലപ്പുഴ: മുല്ലയ്‌ക്കലില്‍ പ്രവര്‍ത്തിച്ചിരുന്ന ഹാന്‍ടെക്‌സ് ഷോറൂം അടഞ്ഞുകിടന്നിട്ട് രണ്ടുമാസം. സ്ഥാപനത്തില്‍ സാമ്പത്തിക തിരിമറി നടന്നതായി ആക്ഷേപമുയര്‍ന്ന സാഹചര്യത്തിലാണ് ഷോറൂം അടച്ചിട്ടിരിക്കുന്നത്.
ജില്ലയില്‍ ഏറ്റവും കൂടുതല്‍ വില്പന നടന്നിരുന്ന സ്ഥാപനമാണിത്. സ്ഥിരം ജീവനക്കാരുടെ ആഭാവമാണ് സ്ഥാപനം അടച്ചിടേണ്ട ഗതികേടുണ്ടാക്കിയത്. ഇത്തരത്തില്‍ നിരവധി ഷോറൂമുകള്‍ അടച്ചുപൂട്ടല്‍ ഭീഷണിയിലാണ്. ഒരു മാനേജര്‍ക്ക് ഏഴു ഷോറൂമുകളുടെ വരെ ചുമതല നോക്കേണ്ട ഗതികേടാണുള്ളത്. നിലവില്‍ ഒരു മാസമായി പത്തുമുതല്‍ 40 ശതമാനം വരെ ഡിസ്‌കൗണ്ട് ഹാന്‍ടെക്‌സ് അനുവദിച്ചിട്ടുണ്ട്.
ഈ സാഹചര്യത്തില്‍ ലക്ഷക്കണക്കിനു രൂപയുടെ വില്പന നടക്കേണ്ട അവസരത്തിലാണ് ഷോറൂം അടഞ്ഞുകിടക്കുന്നത്. പട്ടിണിപ്പാവങ്ങളായ കൈത്തറി, നെയ്‌ത്തു തൊഴിലാളികള്‍ക്ക് ലഭിക്കേണ്ട ആനുകൂല്യം ഇതിനാല്‍ നഷ്ടപ്പെടുകയാണ്. പിഎസ്‌സി, സെയില്‍സ് മാന്‍, സെയില്‍സ് വുമണ്‍ തസ്തികയില്‍ റാങ്ക് പ്രസിദ്ധീകരിച്ചെങ്കിലും ഏതാനും പേരെ മാത്രമാണ് നിയമിച്ചത്. ഹാന്‍ടെക്‌സില്‍ 20 വര്‍ഷം വരെ സ്ഥിരമായി ജോലിചെയ്യുന്ന ദിവസവേതനക്കാരുണ്ട്.
ഇവരുടെ പ്രവര്‍ത്തി പരിചയം കണക്കിലെടുത്ത് സ്ഥിരപ്പെടുത്തുകയോ പിഎസ്‌സി മുഖേന നിയമനം നടത്തുകയോ ചെയ്തില്ലെങ്കില്‍ സ്ഥാപനത്തിന്റെ പ്രവര്‍ത്തനം പൂര്‍ണ്ണമായി നിലയ്‌ക്കാനാണ് സാദ്ധ്യത.
