അഹമ്മദാബാദ്: ജാതിയുടെ അടിസ്ഥാനത്തില് എവിടെ നടക്കുന്ന വേര്തിരിവിനേയും അനീതിയേയും അക്രമത്തേയും രാഷ്ട്രീയ സ്വയംസേവക സംഘം ശക്തമായി എതിര്ക്കുമെന്ന് ഗുജറാത്ത് സംസ്ഥാന ഘടകം പ്രസ്താവിച്ചു.
ഗിര് സോമനാഥ് ജില്ലയിലെ സാമഢിയാല് ഗ്രാമത്തില് ഗോരക്ഷയുടെ പേരില് പിന്നാക്ക വിഭാഗത്തില് പെട്ട ബന്ധുക്കളുടെമേലുണ്ടായ ആക്രമണങ്ങള് മുഴുവന് സമൂഹത്തിനും ഏറെ ദുഃഖവും വേദനയും ഉണ്ടാക്കുന്ന ദുസ്സംഭവമാണ്. ആക്രമണങ്ങളെ ആര്എസ്എസ് അതിശക്തമായി അപലപിക്കുന്നു.
ഗോസംരക്ഷണത്തിന്റെ പേരില്, സ്വന്തം സമൂഹത്തിലെ ബന്ധുജനങ്ങള്ക്കെതിരേ ഇത്തരത്തില് മനുഷ്യത്വ രഹിതമായി പ്രവര്ത്തനങ്ങള് നടത്തുന്നത് കടുത്ത അപരാധമാണ്. ഈ ക്രൂരകൃത്യം നടത്തിയവര്ക്ക് അതികഠിനമായ ശിക്ഷ നല്കേണ്ടതുണ്ടെന്നാണ് ആര്എസ്എസ് നിലപാടെന്ന് പ്രസ്താവന വിശദീകരിയ്ക്കുന്നു.
സമൂഹത്തിന്റെ അവിഭാജ്യഭാഗമായ പിന്നാക്ക വിഭാഗത്തിനുമേല് ഓരോരോ സമയത്ത് നടക്കുന്ന ഇത്തരം ആക്രമണങ്ങളെക്കുറിച്ച് മുഴുവന് സമൂഹവും ചിന്തിക്കുകയും പ്രതികരിയ്ക്കുകയും ചെയ്യേണ്ടതുണ്ട്. നമ്മുടെ സമൂഹം ഒന്നാണ്, അതിന്റെ എല്ലാ വിഭാഗങ്ങളും തമ്മില് പരസ്പര സ്നേഹവും ആത്മഭാവവും ബന്ധുഭാവവും നിലനിര്ത്തേണ്ടതുണ്ട്. ഇത് സാധ്യമാകുന്നുവെന്ന് ഉറപ്പാക്കേണ്ടത് നമ്മുടെയെല്ലാം കര്ത്തവ്യവുമാണ്.
ഈ സാഹചര്യത്തില് ധര്മ്മാചാര്യന്മാരും സാമൂഹ്യ വ്യക്തിത്വങ്ങളും മുന്നിട്ടിറങ്ങി സമൂഹത്തില് സമന്വയവും സമാധാനവും സ്ഥാപിക്കാന് തയ്യാറാകണമെന്ന് ആര്എസ്എസ് പ്രസ്താവനയില് ആഹ്വാനം ചെയ്തു. സമാധാനത്തിലും ശാന്തിയിലും കഴിയുന്ന ഹിന്ദു സമൂഹത്തിന്റെ മേലാണ് ഈ കുഴപ്പങ്ങള് സംഭവിച്ചിരിക്കുന്നത്. ഇത്തരം സംഭവങ്ങള് സമൂഹത്തില് ഐക്യത്തിന്റെ അന്തരീക്ഷം ഇല്ലാതാക്കുന്നു.
സര്ക്കാരും സമൂഹത്തിലെ വിവിധ നേതാക്കളും സമാധാനവും ശാന്തിയും സംരക്ഷിക്കാനാവശ്യമായ പ്രഖ്യാപനം നടത്തേണ്ടതുണ്ട്. ഈ ദുസ്സംഭവത്തില്നിന്ന് സമൂഹത്തില് ജാതിയുടെയോ രാഷ്ട്രീയത്തിന്റെയോ നേട്ടങ്ങള് ഉണ്ടാക്കാന് നടത്തുന്ന പ്രയത്നങ്ങള് തികച്ചും അനുചിതമാണ്, പ്രസ്താവന പറയുന്നു.
