ഇരിട്ടി: കരിക്കോട്ടക്കരി പാറക്കപ്പാറയിലെ ജനവാസകേന്ദ്രത്തിലിറങ്ങിയ കാട്ടാനയെ വനപാലകരും, പോലീസും നാട്ടുകാരും ചേര്ന്ന് വനത്തിലേക്ക് തിരിച്ചുവിടാനുള്ള ശ്രമത്തിനിടെ ചെരിഞ്ഞു. മുപ്പതു വയസ്സോളം പ്രായം തോന്നിക്കുന്ന പിടിയാനയാണ് ചരിഞ്ഞത്.
തിങ്കളാഴ്ച രാവിലെ 6 മണിയോടെയാണ് പാറക്കപ്പാറയിലെ പടിക്കപ്പറമ്പില് ആന്റണി തന്റെ കൃഷിയടത്തിലിറങ്ങിയ ആനയെ കാണുന്നത്. നാട്ടുകാര് വിവരമറിയച്ചതിനെ തുടര്ന്ന് ഡി എഫ് ഓ സുനില് പാടമി, റെയിഞ്ച് ഓഫീസര് സോളമന്, അസി.വൈല്ഡ് ലൈഫ് വാര്ഡന് പി. മധുസൂദനന്, ഫോറസ്റ്റര്മാരായ മനോഹരന് കോട്ടാത്തു, എം. ഉണ്ണി കൃഷ്ണന് എന്നിവരുടെ നേതൃത്വത്തിലുള്ള വനപാലക സംഘവും കരിക്കോട്ടക്കരി എസ്ഐ ടി.സജിത്തിന്റെ നേതൃത്വത്തിലുള്ള പോലീസ് സംഘവും പഞ്ചായത്ത് പ്രസിഡന്റ് അഡ്വ.ഷീജ സെബാസ്റ്റ്യന്, ഇരിട്ടി ബ്ലോക്ക് പഞ്ചായത്ത് പ്രസിഡന്റ് എന്.ടി.റോസമ്മ മറ്റു ജനപ്രതിനിധികള് എന്നിവര് സ്ഥലത്തെത്തി. 11 മണിയോടെ ആനയെ കാട്ടിലേക്ക് തിരിച്ചുവിടാനുള്ള ശ്രമം തുടങ്ങിയെങ്കിലും ആന ജനവാസ കേന്ദ്രത്തില്ത്തന്നെ നിലയുറപ്പിച്ചു. ഒടുവില് 12 മണിയോടെ ആന പാറക്കപ്പാറയിലെ കൈത്തോടിന് കരയില് കുഴഞ്ഞുവീണ് ചരിയുകയായിരുന്നു.
ആനയുടെ വലതു വശത്തെ കാലിന്റെയും വയറിന്റെയും ഇടയിലായി മുറിവേറ്റ പാടുണ്ട്. ഇത് വെടിയെട്ടത് മൂലം ഉനാടായതാണോ എന്ന സംശയവും ഉണ്ട്. വൈകുന്നേരം 5 മണിയോടെ മൃഗ ഡോക്ടര് മാരായ പി.എന്. ഷിബു, കെ.മഞ്ഞപ്പ എന്നിവരെത്തി പോസ്റ്റ്മോര്ട്ടം നടപടികള് പൂര്ത്തിയാക്കി ജഡം പാരക്കപ്പാരയില് തന്നെ മറവ് ചെയ്തു. പോസ്റ്റ്മോര്ട്ടം റിപ്പോര്ട്ട് കിട്ടിയാല് മാത്രമേ മരണകാരണം എന്താണെന്ന് പറയാനാവൂ.
