പാരിസ്: ഭീകരത എന്നത് ഫ്രഞ്ച് ജനതയുടെ ദൈനം ദിന ജീവിതത്തിലെ ഭാഗമായി ദീർഘ നാളത്തേക്ക് മാറിയിരിക്കുകയാണെന്ന് പ്രധാനമന്ത്രി മാനുവൽ വാൾസ്. ദു ദിമാച്ചേ എന്ന ഫ്രഞ്ച് മാസികക്ക് നൽകിയ അഭിമുഖത്തിലാണ് അദ്ദേഹം ഇത്തരത്തിൽ പ്രസ്താവന നൽകിയത്.
രാജ്യത്തെ ചില ചുമതലബോധമില്ലാത്ത രാഷ്ട്രീയക്കാർ പറയുന്നു നീസിലുണ്ടായ ആക്രമണം ഒഴിവാക്കാനാകുമായിരുന്നെന്ന്. എന്നാൽ ഒരു റിസ്കുമില്ലാതെ ഭീകരവാദത്തെ തടയാനാവില്ല. താൻ ഭീകരവാദത്തിന്റെ യഥാർത്ഥ്യത്തെക്കുറിച്ച് നിരവധി തവണ വ്യക്തമാക്കിയിട്ടുള്ളതാണ്- മാനുവൽ വാൾ പറഞ്ഞു.
ഫ്രഞ്ച് ജനത ഇപ്പോൾ യുദ്ധ സാഹചര്യത്തിലൂടെയാണ് മുന്നോട്ട് പോകുന്നത്. ഇനിയും ഒരുപാട് ആക്രമണങ്ങൾ ഉണ്ടായേക്കാം അതിൽ ഒരുപാട് ജീവനുകൾ നഷ്ടപ്പെട്ടേക്കാം, ഭീകരതയെന്ന ദുഷിപ്പിനെ രാജ്യത്തു നിന്നും പുറത്താക്കാൻ ഇനിയും ഏറെ നാളുകൾ വേണം- അദ്ദേഹം കൂട്ടിച്ചേർത്തു.
കഴിഞ്ഞ ദിവസം ഫ്രാൻസിലെ നീസിലുണ്ടായ ആക്രമണത്തിൽ 84 പേർ കൊല്ലപ്പെടുകയും 300ഓളം പേർക്ക് ഗുരുതരമായി പരിക്കേൽക്കുകയും ചെയ്തു. ദേശീയ ദിനം ആഘോഷിച്ച് കൊണ്ടിരുന്ന ജനക്കൂട്ടത്തിനിടയിലേക്ക് അക്രമി ട്രക്ക് ഓടിച്ചു കയറ്റിയാണ് വൻ ദുരന്തം സൃഷ്ടിച്ചത്.
