ഇറ്റാനഗര്: അരുണാചല്പ്രദേശ് മുഖ്യമന്ത്രിയായി പെമ ഖണ്ഡു ഇന്ന് ചുമതലയേല്ക്കും. ഭൂരിപക്ഷം തെളിയിക്കാന് കോണ്ഗ്രസ് സര്ക്കാര് വിശ്വാസവോട്ടെടുപ്പ് നടത്തണമോ എന്നകാര്യത്തില് ഗവര്ണര് ഇന്ന് അന്തിമതീരുമാനം എടുത്തേക്കുമെന്നും സൂചനയുണ്ട്.
അരുണാചല് മുന് മുഖ്യമന്ത്രി ഡോര്ജി ഖണ്ഡുവിന്റെ മകനാണ് മുപ്പത്തേഴുകാരനായ പെമ ഖണ്ഡു. അധികാരമേല്ക്കുന്നതോടെ ഏറ്റവും പ്രായം കുറഞ്ഞ മുഖ്യമന്ത്രിയാകും പെമ ഖണ്ഡു.
വിമത എംഎല്എമാര് തിരികെയെത്താന് കാരണമായ പെമ ഖണ്ഡുവിന്റെ നേതൃത്വം സുഗമമായ ഭരണത്തിനും സഹായകമാകുമെന്നാണ് കോണ്ഗ്രസ് നേതൃത്വത്തിന്റെ കണക്കു കൂട്ടല്.
ഇനി അഭിപ്രായവ്യത്യാസങ്ങളില്ലെന്നും വ്യക്തമായ ഭൂരിപക്ഷത്തോടെ കോണ്ഗ്രസ് ഭരണം നടത്തുമെന്നും പെമ ഖണ്ഡു പറഞ്ഞു.
ആറ് മാസത്തിന് മുമ്പ് തന്നെ നബാം തുകിയെ മുഖ്യമന്ത്രി സ്ഥാനത്ത് നിന്ന് നീക്കണമെന്ന് രാഹുല് ഗാന്ധിയോട് വിമത നേതാക്കള് ആവശ്യപ്പെട്ടിരുന്നെങ്കിലും അതിന് ഫലമുണ്ടായിരുന്നില്ല. ഇടക്കാല മുഖ്യമന്ത്രിയായിരുന്ന വിമത നേതാവ് കലിഫോ പുല്ലും പെമ ഖണ്ഡുവിനെ പിന്തുണച്ച് രംഗത്തുണ്ട്.
