കണ്ണൂര്: കലാസാംസ്കാരിക കൂട്ടായ്മയായ ക്രിയേറ്റീവ് സൈക്കിള് ഏര്പ്പെടുത്തിയ പ്രഥമ സൈക്കിള് ലിറ്റററി അവാര്ഡിന് ഇ.എം.ഹാഷിം അര്ഹനായി. മലയാളത്തിലെ സൂഫി സാഹിത്യത്തിനും മിസ്റ്റിക് എഴുത്തിനും അദ്ദേഹം നല്കിയ സമഗ്രസംഭാവനകള് പരിഗണിച്ചാണ് പുരസ്കാരം നല്കുന്നതെന്ന് ഭാരവാഹികള് പത്രസമ്മേളനത്തില് അറിയിച്ചു. എഴുത്തുകാരനായ എം.എന്.കാരശ്ശേരി, മാധ്യമപ്രവര്ത്തകനായ എം.വി.നികേഷ്കുമാര്, നിരൂപകന് സി.ഇ.സുനില് എന്നിവരടങ്ങുന്ന പാനലാണ് അവാര്ഡിനായി ഇ.എം.ഹാഷിമിനെ തെരഞ്ഞെടുത്തത്. പത്തായിരത്തൊന്ന് രൂപയും സൈക്കിള് സല്യൂട്ട് പ്രശസ്തിപത്രവും ശില്പവും അടങ്ങുന്നതാണ് പുരസ്ക്കാരം. ഇതോടൊപ്പം മുപ്പത് വയസ്സില് താഴെയുള്ളവര്ക്കായി ക്രിയേറ്റീവ് സൈക്കിള് ഏര്പ്പെടുത്തിയ സൈക്കിള് യംഗ് ലിറ്റററി അവാര്ഡിന് ഡോ.മനോജ് വെള്ളനാട് അര്ഹനായി. അഗ്നിയിലെരിയാത്ത ആയുധങ്ങള് എന്ന ചെറുകഥക്കാണ് പുരസ്ക്കാരം. കഥാകൃത്തുകളായ ശിഹാബുദ്ദീന് പൊയ്ത്തുംകടവ്, വി.ജെ.ജെയിംസ്, വീണ എന്നിവരടങ്ങിയ ജഡ്ജിങ്ങ് കമ്മറ്റിയാണ് ഡോ.മനോജ് വെള്ളനാടിനെ പുരസ്ക്കാരത്തിനായി തെരഞ്ഞെടുത്തത്. 3001 രൂപയും സൈക്കിള് സല്യൂട്ട് പ്രശസ്തി പത്രവും അടങ്ങുന്നതാണ് യംഗ് ലിറ്റററി അവാര്ഡ്. 24ന് ഉച്ചക്ക് മൂന്നിന് ചേമ്പര് ഹാളില് നടക്കുന്ന പരിപാടിയില് വെച്ച് എഴുത്തുകാരന് എം.മുകുന്ദന് പുരസ്ക്കാരങ്ങള് വിതരണം ചെയ്യും. തുടര്ന്ന് ഗസല് ഗായിക നിസാ അസീസിയുടെ ഖവാലി സായാഹ്നവും ഉണ്ടാകും. ഭാരവാഹികളായ ടി.പി.ഖാലിദ്, വി.എച്ച്.നൗഷാദ്, സി.ഇ.സുനില് എന്നിവര് പത്രമ്മേളനത്തില് പങ്കെടുത്തു.
പ്രഥമ സൈക്കിള് ലിറ്റററി അവാര്ഡ് ഇ.എം.ഹാഷിമിന്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.