കണ്ണൂര്‍: കണ്ണൂര്‍ സര്‍വ്വകലാശാലയുടെ കീഴിലുള്ള കോളേജുകളില്‍നിന്നും എന്‍എസ്എസിന്റെ മന്ത്‌ലി പ്രോഗ്രസ് റിപ്പോര്‍ട്ട് തയ്യാറാക്കി അയക്കുന്നതിനുള്ള സോഫ്റ്റ്‌വേര്‍ തയ്യാറായി- സോഫ്റ്റ്‌വേയറിന്റെ ഔപചാരിക ഉദ്ഘാടനം പ്രോ. വൈസ്ചാന്‍സലര്‍ ഡോ.ടി. അശോകന്‍ ഉദ്ഘാടനം ചെയ്തു. നേരത്തെ കോളേജുകളില്‍ നിന്നും തയ്യാറാക്കി അയച്ചിരുന്ന പ്രോഗ്രസ് റിപ്പോര്‍ട്ട് യഥാസമയം ലഭിക്കാത്ത പ്രശ്‌നത്തിനുള്ള പരിഹാരമായാണ് സര്‍വ്വകലാശാല വെബ്‌സൈറ്റില്‍ ഇതിനു പ്രതേ്യക ലിങ്ക് തയ്യാറാക്കിയത്. ഇതുവഴി സര്‍വ്വകലാശാലയില്‍ ലഭിക്കുന്ന റിപ്പോര്‍ട്ടുകള്‍ സംസ്ഥാന എന്‍എസ്എസ് സെല്ലിലേക്കും ദേശീയ എന്‍.എസ്.എസ് സെല്ലിലേക്കും കൃത്യസമയത്തുതന്നെ അയക്കാന്‍ സാധിക്കും.
സര്‍വ്വകലാശാലയുടെ കീഴിലുള്ള കോളേജുകളില്‍ നിന്നുള്ള എന്‍.എസ്.എസ് പ്രോഗ്രാം ഓഫീസര്‍മാരുടെ യോഗവും നടന്നു. യുവതലമുറയെ സമചിത്തതയോടെ ദേശസ്നേഹികളാക്കി മാറ്റാനുള്ള ഭാരിച്ച ഉത്തരവാദിത്തമാണ് എന്‍.എസ്.എസ് പ്രോഗ്രാം ഓഫീസര്‍മാര്‍ക്കുള്ളതെന്ന് പരിപാടി ഉദ്ഘാടനം ചെയ്ത പ്രോ. വൈസ്ചാന്‍സലര്‍ ഡോ.ടി.അശോകന്‍ പറഞ്ഞു. നമ്മുടെ യുവജനസമൂഹത്തെ നേര്‍വഴിക്കു നയിക്കുന്നതും അപഥസഞ്ചാരം തടയുന്നതും കാലിക പ്രാധാന്യമുള്ള വിഷയമായിത്തീര്‍ന്നിരിക്കുകയാണെന്നും എന്‍.എസ്.എസ് യൂണിറ്റുകള്‍ക്ക് ഇതില്‍ വലിയൊരുപങ്കു വഹിക്കാനുണ്ടെന്നും ചടങ്ങില്‍ അദ്ധ്യക്ഷതവഹിച്ച സര്‍വ്വകലാശാല രജിസ്ര്ടാര്‍ ഡോ. ബാലചന്ദ്രന്‍ കീഴോത്ത് അഭിപ്രായപ്പെട്ടു.
ചടങ്ങില്‍ എന്‍എസ്എസ് റീജിയണല്‍ ഡയരക്ടര്‍ ജി.പി.സജിത്ത്ബാബു, എന്‍എസ്എസ് ട്രെയിനിംഗ് കോര്‍ഡിനേറ്റര്‍ ഐ.വി സോമന്‍, കണ്ണൂര്‍ ആകാശവാണി ഡയരക്ടരും എന്‍എസ്.എസ് അഡൈസറുമായ കെ.ബാലചന്ദ്രന്‍, എന്‍എസ്എസ് പ്രോഗ്രാം കോര്‍ഡിനേറ്റര്‍ കെ.പി.മുഹമ്മദ്, കെ.എന്‍.ദിലീപ് എന്നിവര്‍ സംസാരിച്ചു.
