കോഴിക്കോട്: സ്വയം പര്യാപ്തമായ സ്മാര്ട്ട് വില്ലേജ് പ്രോജക്ടുമായി ബിടെക് സിവില് എന്ജിനീയറിംഗ് വിദ്യാര്ഥിനി. പി സ്വര്ണ ദാസാണ് മഴവെള്ളസംഭരണവുമായി ബന്ധപ്പെട്ട് അവാര്ഡ് കരസ്ഥമാക്കിയ തന്റെ പ്രോജക്ട് സംസ്ഥാന സര്ക്കാറിന് സമര്പ്പിക്കാനൊരുങ്ങുന്നത്. സുസ്ഥിരവികസനത്തിന് വിഭവആസൂത്രണവും മാനേജ്മെന്റും എത്രമാത്രം പ്രാധാന്യമര്ഹിക്കുന്നു എന്നാണ് പ്രോജക്ടിലൂടെ അവതരിപ്പിക്കുന്നതെന്ന് സ്വര്ണദാസ് വാര്ത്താസമ്മേളനത്തില് അറിയിച്ചു.
കേന്ദ്രീകൃത വിഭവനിയന്ത്രണ പദ്ധതികള് വഴി ജലക്ഷാമം കുറയ്ക്കല്, സുസ്ഥിര ഊര്ജ ഉല്പാദനത്തിനായുള്ള നിര്ദേശങ്ങള്, പുനര്ചക്രമണത്തിന് സാധിക്കുന്ന ഊര്ജ സ്രോതസ്സുകളെ ഉപയോഗപ്പെടുത്തല് എന്നിവയാണ് പദ്ധതിയിലുള്ളത്. ആദ്യഘട്ടത്തില് മഴവെള്ള സംഭരണത്തിന് ഊന്നല് നല്കുന്ന പദ്ധതി രണ്ടാംഘട്ടത്തില് വീടുകളില് നിന്ന് മഴവെള്ളം സംഭരിച്ച് പായ്ക്ക് ചെയ്ത് വിദേശരാജ്യങ്ങളിലേക്ക് കയറ്റുമതിചെയ്യുന്നതും ലക്ഷ്യമിടുന്നു. ഒരു ഹെക്ടറില് മൂന്നുദശലക്ഷം മില്ലിലിറ്റര് മഴവെള്ളം കേരളത്തില് ലഭിക്കുന്നുണ്ട്. ഏകദേശം ഇരുപത് വീടുകളില് നിന്ന് ലഭിക്കുന്ന മഴവെള്ളം ശേഖരിച്ച് കയറ്റുമതി ചെയ്താല് പ്രതിവര്ഷം ആറര ലക്ഷത്തോളം രൂപയുടെ വരുമാനമാണ് ലഭിക്കുക. ഗ്രാമങ്ങളില് പിന്നാക്കം നില്ക്കുന്ന ഉല്പ്പാദന മേഖലയുള്ളവരുടെ ഉല്പ്പന്നങ്ങള് കയറ്റുമതി ചെയ്യാന് കഴിയുന്ന തരത്തില് കിടയറ്റതാക്കുകയെന്നതാണ് മറ്റൊരു പദ്ധതി. ഇതിനായി അവര്ക്ക് പരിശീലനങ്ങളും പ്രോല്സാഹനവും നല്കാനും പദ്ധതിയില് നിര്ദ്ദേശമുണ്ടെന്നും പ്രോജക്ട് അടുത്തുതന്നെ മുഖ്യമന്ത്രിക്കും ധനമന്ത്രിക്കും കൈമാറുമെന്നും സ്വര്ണദാസ് കൂട്ടിച്ചേര്ത്തു. വാര്ത്താസമ്മേളനത്തില് പ്രോജക്ട് കോഓഡിനേറ്റര് പി രമേശന് പങ്കെടുത്തു
