ബജറ്റ് കാര്‍ഷിക, മത്സ്യ മേഖലകള്‍ക്ക് നിരാശ

ആലപ്പുഴ: ഇടതു സര്‍ക്കാരിന്റെ ആദ്യ ബജറ്റില്‍ കാര്‍ഷിക, മത്സ്യമേഖലകള്‍ക്ക് കടുത്ത അവഗണന. നെല്‍കര്‍ഷകര്‍ നേരിടുന്ന പ്രധാന പ്രശ്‌നം നെല്ലുവില യഥാസമയം ലഭിക്കുന്നില്ലായെന്നതാണ്. കാലങ്ങളായി ഈ പ്രശ്‌നം അവര്‍ നേരിടുന്നു. കഴിഞ്ഞ പുഞ്ചകൃഷിയുടെ നെല്ലുവില ഇതുവരെയും ലഭിക്കാത്ത കര്‍ഷകരുമുണ്ട്. എന്നാല്‍ ഇത്തവണത്തെ ബജറ്റില്‍ നെല്ലുവില നല്‍കുന്നതിന് കേവലം 385 കോടി രൂപ മാത്രമാണ് പ്രഖ്യാപിച്ചിട്ടുള്ളത്. ഇത് വളരെക്കുറവാണെന്നാണ് കര്‍ഷകരുടെ വിമര്‍ശനം.

ഒരുവര്‍ഷം രണ്ട് കൃഷി സീസണുകളിലായി കുറഞ്ഞത് ആയിരം കോടി രൂപയെങ്കിലും നീക്കിവച്ചെങ്കില്‍ മാത്രമേ നെല്‍കര്‍ഷകര്‍ക്ക് യഥാസമയം നെല്ലുവില ലക്ഷിക്കുകയുള്ളൂ. കാര്‍ഷിക മേഖലയ്‌ക്ക് റിവോള്‍വിങ് ഫണ്ടും പ്രഖ്യാപിച്ചിട്ടില്ല. കര്‍ഷകരുടെ കാലങ്ങളായുള്ള ആവശ്യമായ പാഡി ബോര്‍ഡും ബജറ്റില്‍ ഉള്‍പ്പെടുത്തിയിട്ടില്ല.

മറ്റുചില പ്രഖ്യാപനങ്ങളുടെ അവസ്ഥ മുന്‍കാല ബജറ്റുകളുടേതുപോലെ ആകരുതെന്നാണ് കര്‍ഷകരുടെ ആവശ്യം. കുട്ടനാടിനായുള്ള സമഗ്ര കുടിവെള്ള പദ്ധതിയും നേരത്തെ തന്നെ പ്രഖ്യാപിച്ചിട്ടുള്ളതാണ്. ഇത്തവണയും ഇതിന്റെ ആവര്‍ത്തനമാണുണ്ടായത്. നാളികേര സംഭരണത്തിനായും 25 കോടി രൂപ മാത്രമാണ് നീക്കിവച്ചിട്ടുള്ളത്. കുറഞ്ഞത് നൂറുകോടിയെങ്കിലും അനുവദിക്കണമായിരുന്നുവെന്നാണ് കര്‍ഷകരുടെ അഭിപ്രായം. കഴിഞ്ഞ മൂന്നു മാസമായ സംഭരിച്ച വില ലഭിക്കാത്ത നാളികേര കര്‍ഷകരുമുണ്ട്.

കടല്‍ഭിത്തി നിര്‍മാണത്തിന് 300 കോടി രൂപ മാത്രമാണ് വകയിരുത്തിയിട്ടള്ളത്. ഇത് തീരെ അപര്യാപ്തമാണെന്നാണ് തീരദേശ വാസികളുടെ വിമര്‍ശനം. ഓരോ ജില്ലയ്‌ക്കും കൃത്യമായി ഫണ്ടും ഇതിനായി പ്രഖ്യാപിച്ചിട്ടില്ല. മത്സ്യത്തൊഴിലാളികളുടെ പഞ്ഞമാസ സമാശ്വാസ പദ്ധതി ആനൂകൂല്യം വര്‍ദ്ധിപ്പിച്ച ബജറ്റ് പ്രഖ്യാപനം തട്ടിപ്പാണെന്നും വിമര്‍ശനമുയരുന്നു. പദ്ധതിയുടെ ആനൂകൂല്യം നേരത്തെ കേന്ദ്രസര്‍ക്കാരാണ് വര്‍ദ്ധഇപ്പിച്ചത്. ഇതുപ്രകാരം 1,800 രൂപയില്‍ നിന്നും 3,600 രൂപ മത്സ്യത്തൊഴിലാളികള്‍ക്കു ലഭിക്കും.

തീരസംരക്ഷണ പദ്ധതിയുടെ വിലയിരുത്തല്‍ നടത്തും. മത്സ്യത്തൊഴിലാളികള്‍ക്ക് നിലവിലെ ഭൂമിയുടെ അവകാശം നിലനിര്‍ത്തിക്കൊണ്ട് സുരക്ഷിത മേഖലയിലേക്ക് മാറിത്താമസിക്കാന്‍ 10 ലക്ഷം രൂപ ധനസഹായം അനുവദിക്കും.

നെല്ലിനെ അടിസ്ഥാനമാക്കിയുള്ള അഗ്രോപാര്‍ക്ക് കുട്ടനാട്ടിലാരംഭിക്കും, കുട്ടനാട് പരിസ്ഥിതി പുനസ്ഥാപന പദ്ധതി നടപ്പാക്കും, പഠനം നടത്താന്‍ 50 ലക്ഷം, ചക്കയുടെ ഗവേഷണത്തിനും പ്രചാരണത്തിനും പദ്ധതി തയ്യാറാക്കാന്‍ പത്തനംതിട്ട, കായംകുളം കാര്‍ഷിക വികസന കേന്ദ്രത്തിന് അഞ്ച് കോടി എന്നിവയും ബജറ്റ് പ്രഖ്യാപനത്തിലുണ്ട്.