കോട്ടയം: ജീവനക്കാരില്ലാത്ത എസ്എച്ച്മൗണ്ട് സബ്ബ്എന്ജനീയര് ആഫീസ് വൈദ്യുത ഉപഭോക്താക്കള്ക്ക് ദുരിതമാകുന്നു. കോട്ടയം ഈസ്റ്റ് സെക്ഷന്റെ കീഴില് ചവിട്ടുവരിയില് പ്രവര്ത്തിക്കുന്ന ഈ ആഫീസിന് സബ്ബ്എന്ജിനീയര് ആഫീസ് എന്ന പേരുമാത്രമാണ് ഉള്ളത്. ആദ്യകാലത്ത് അസ്സി. എന്ജിനീയറും നാലോളം ഓവര്സിയര്മാരും ഉള്പ്പെടെ പതിനഞ്ചോളം ജീവനക്കാരുണ്ടായിരുന്നു. ഇപ്പോള് ഒരു സബ് എന്ജിനീയറടക്കം നാലുപേരാണ് ഇവിടെയുള്ളത്.
യാതൊരു കാരണവുമില്ലെങ്കിലും ഈ ഭാഗത്ത് ദിവസവും കറന്റ് പോകും. ജനങ്ങള് ഇതുമൂലം തീരാദുരിതത്തിലാണ്. പ്രകൃതിക്ഷോഭം, ലൈന് പൊട്ടിവീഴല്, പോസ്റ്റ് ഒടിഞ്ഞുവീഴല് തുടങ്ങിയ കാരണങ്ങളാല് കറന്റ് പോകാം. പക്ഷേ ഈ ഭാഗത്ത് കറന്റ് പോകാന് ഇതൊന്നും ആവശ്യമില്ല. അഥവാ ഇങ്ങനെ സംഭവിച്ചാല് ദിവസങ്ങള് കഴിഞ്ഞേ വൈദ്യുതി ബന്ധം പുനസ്ഥാപിക്കാറുള്ളൂ. രാത്രിയെന്നോ പകലന്നോ വ്യത്യാസമില്ലാതെ ഏതുസമയത്തും ഇവിടെ വൈദ്യുതി ബന്ധം തകരാറിലാകും. പഠിക്കുന്ന കുട്ടികള്ക്കും പ്രായമായവര്ക്കുമാണ് ഇതുമൂലം കൂടുതല് ക്ലേശങ്ങള് അനുഭവിക്കേണ്ടി വരുന്നത്.
ഏതാണ്ട് ഇരുപതിനായിരത്തോളം ഉപഭോക്താക്കളാണ് ഈ ഓഫീസിന്റെ കീഴിലുള്ളത്. ലൈനുകളുടെ അറ്റകുറ്റപ്പണികള്, മീറ്റര് മാറ്റിവയ്ക്കല് തുടങ്ങിയവയും ഗുണഭോക്താക്കളുടെ പരാതികളും പരിഹരിക്കാന് ആവശ്യത്തിന് ജീവനക്കാര് ഇവിടെയില്ല. കറന്റ് പോയാലോ, മറ്റത്യാവശ്യ സന്ദര്ഭങ്ങളിലോ ഇവിടേക്ക് ഫോണ് ചെയ്താല് എടുക്കാറില്ല. അഥവാ എടുത്താല് തന്നെ കൃത്യമായ മറുപടിയും ജീവനക്കാരുടെ ഭാഗത്തുനിന്നും ലഭിക്കാറില്ല. ഉപഭോക്താക്കളുടെ ഗണ്യമായ
വര്ദ്ധനമൂലമാണ് ഈ ഓഫീസ് ഇവിടെ സ്ഥാപിതമായത്. ഈ ഓഫീസ് ഇപ്പോള് തിരുവഞ്ചൂരിലേക്ക് മാറ്റാനുള്ള നീക്കം നടക്കുന്നതായും പറയപ്പെടുന്നു. ഈ അവസ്ഥയെപ്പറ്റി പലപ്രാവശ്യം നാട്ടുകാര് പരാതിപ്പെട്ടെങ്കിലും അതെല്ലാം രോദനമായി മാറുകയാണുണ്ടായത്. ദിവസവും മുടക്കംകൂടാതെ വൈദ്യുതി ലഭിക്കണമെന്ന പ്രാര്ത്ഥനമാത്രമാണ് ഇപ്പോള് നാട്ടുകാര്ക്കുള്ളത്. ഈ അനാസ്ഥയ്ക്കെതിരെ രാഷ്ട്രീയ കക്ഷികളും പലപ്രാവശ്യം സമരം നടത്തിയിട്ടുണ്ട്. എങ്കിലും ഈ പ്രശ്നം പരിഹരിക്കപ്പെട്ടിട്ടില്ല. ഈ അനീതി തുടര്ന്നാല് ഓഫീസ് ഉപരോധം ഉള്പ്പെടെയുള്ള സമര പരിപാടികളുമായി രംഗത്തിറങ്ങാനാണ് നാട്ടുകാരുടെയും രാഷ്ട്രീയ പാര്ട്ടികളുടെയും തീരുമാനം.
