”ഇന്നുതന്നെ താന് അയോദ്ധ്യയിലേക്കു മടങ്ങാന് ആഗ്രഹിക്കുന്നു.” എന്നുപറഞ്ഞ രാമനോട് പുഷ്പകവിമാനത്തില് പോകാമെന്ന് വിഭീഷണന് നിര്ദ്ദേശിക്കുന്നു. രാമന്റെ അനുവാദം കിട്ടിയപ്പോള് പുഷ്പകവിമാനം വന്ന് ശ്രീരാമനെ വണങ്ങി. ശ്രീരാമന്, സീതയോടും ലക്ഷ്മണനോടുംകൂടി വിമാനത്തില് കയറി മാരുതി, അംഗദന്, സുഗ്രീവന്, ജാംബവാന് തുടങ്ങിയ കപിശ്രേഷ്ഠരും വാനരസൈന്യവും കയറി. വിഭീഷണനോട് ലങ്കയില് നീ ചെന്നു വാഴുകയെന്നു പറഞ്ഞു. അപ്പോള് അയോദ്ധ്യനഗരം തങ്ങള്ക്കും കാണണമെന്ന് വിഭീഷണന് ആഗ്രഹം പ്രകടിപ്പിച്ചു. രാമന് അനുവദിച്ചു. വിഭീഷണന് ഭാര്യ സരമയോടും മക്കളോടും മറ്റു മുഖ്യരാക്ഷസന്മാരോടുംകൂടി വിമാനത്തില് കയറി. എത്രയാളുകയറിയാലും വികസിക്കുന്നതും മനസ്സുകൊണ്ടു നിയന്ത്രിക്കുന്നതുമായ ആ അത്ഭുതവിമാനം ഉത്തരദിക്കിലേക്ക് പ്രയാണം തുടങ്ങി.
വിമാനം കടല്കടന്ന് രാമേശ്വരത്തെത്തിയപ്പോള് ശ്രീരാമന് സീതയ്ക്ക് സേതു കാണിച്ചുകൊടുത്തു. വനദൃശ്യങ്ങള്, ഋശ്യമൂലാചലത്തില് സുഗ്രീവനുമായി സഖ്യം നടന്നസ്ഥലം എന്നിവ കണ്ട് വിമാനം കിഷ്കിന്ധക്കുമുകളിലെത്തി. അപ്പോള് സീത രാമനോടു ഒരാഗ്രഹം പ്രകടിപ്പിക്കുന്നു. ”ഈ വാനരമുഖ്യന്മാര് വളരെ നാളായി ഭാര്യമാരെ പിരിഞ്ഞിരിക്കുകയല്ലോ? ഭര്ത്തൃവിയോഗദുഃഖം ഞാന് അനുഭവിച്ചറിഞ്ഞതാണ്. എല്ലാവരുടെയും ഭാര്യമാരെക്കൂടി കൊണ്ടുപോകണം.” ശ്രീരാമന് സമ്മതിച്ചപ്പോള് വിമാനം നിലത്തിറങ്ങി. താര, രുമ തുടങ്ങിയവരെക്കൂടാതെ വാനരവീരരുടെ ഭാര്യമാരെയെല്ലാം വിമാനത്തില് കയറ്റി വീണ്ടും ഉയര്ന്ന പുഷ്പകം പഞ്ചവടി, ചിത്രകൂടം തുടങ്ങിയ സ്ഥലങ്ങള് പിന്നിട്ട് ഭരദ്വാജാശ്രമത്തിലെത്തി. ഭരദ്വാജ മഹര്ഷിയെ വന്ദിച്ചിട്ടുപോകാമെന്നു തീരുമാനിച്ചു.
ശ്രീരാമനും സംഘവും ഭരദ്വാജമുനിയെ വണങ്ങി. മഹര്ഷി അയോദ്ധ്യയിലെ വിശേഷങ്ങള് വിവരിച്ചു കേള്പ്പിക്കുന്നു. ശ്രീരാമന് വനത്തിലേക്കുപോയശേഷം ഭരതശത്രുഘ്നമാര് അയോദ്ധ്യയില് പ്രവേശിച്ചിട്ടില്ല. രാഘവനെയും കൊണ്ടേ കയറുകയുള്ളൂ എന്ന നിശ്ചയത്തോടെ അടുത്തുള്ള നന്ദിഗ്രാമത്തില് വസിക്കുന്നു. ജടാവല്ക്കലങ്ങള് ധരിച്ച് ഫലമൂലാദികള് ഭക്ഷിച്ച് വെറും നിലത്തു ശയിക്കുന്നു. നിത്യവും ശ്രീരാമപാദുകങ്ങള് പൂജിച്ചശേഷം രാമന്റെ പ്രതിനിധിയായി രാജ്യഭരണം നന്നായി നടത്തുന്നു. ജനങ്ങള്ക്കെല്ലാം സുസമ്മതനായി ഭരിക്കുന്നു. ലങ്കയില് നടന്ന കാര്യങ്ങള് മഹര്ഷി ജ്ഞാനദൃഷ്ടികൊണ്ട് അറിഞ്ഞു. എല്ലാവരും അന്നവിടെ വിശ്രമിച്ച് രാവിലെ അയോദ്ധ്യയിലേക്ക് എഴുന്നള്ളാമെന്ന് മഹര്ഷി നിര്ദ്ദേശിച്ചു. പക്ഷേ നാളെ പുലര്ച്ചക്ക് രാമന് എത്താത്തപക്ഷം ഭരതന് പ്രതിജ്ഞ നിറവേറ്റാന് അഗ്നിയില് പ്രവേശിച്ചുകളഞ്ഞാലോ?
