കണ്ണൂര്‍: പതിറ്റാണ്ടുകളായി നിലനില്‍ക്കുന്ന ഭൂമിപ്രശ്‌നം പരിഹരിക്കുന്നതിന് മുഖ്യ പരിഗണന നല്‍കുമെന്ന് റവന്യു വകുപ്പ്മന്ത്രി ഇ.ചന്ദ്രശേഖരന്‍ പറഞ്ഞു. കലക്ടറേറ്റില്‍ പുതുതായി നിര്‍മിച്ച ഓഡിറ്റോറിയത്തിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. തുറമുഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി അധ്യക്ഷത വഹിച്ചു.
തലമുറകളായി കൈവശം വെച്ചുവരുന്ന ഭൂമിക്ക് പട്ടയം കിട്ടാത്ത പ്രശ്‌നം രൂക്ഷമാണെന്ന് മന്ത്രി പറഞ്ഞു. ഭൂപരിഷ്‌കരണ നിയമം വന്ന് നാലര പതിറ്റാണ്ട് കഴിഞ്ഞിട്ടും ലാന്റ് ട്രൈബ്യൂണലുകളില്‍ അപേക്ഷകള്‍ കെട്ടിക്കിടക്കുകയാണ്. സംസ്ഥാനത്താകെ 89000 അപേക്ഷയാണ് ഇങ്ങനെയുളളത്. അപേക്ഷകള്‍ ഇങ്ങനെ കെട്ടിക്കിടക്കുന്നതിന് ഒരു ന്യായീകരണവുമില്ല. ഇതിന് പരിഹാരം വേണം. ഇതിനാവശ്യമായ നടപടി ത്വരിതഗതിയില്‍ സ്വീകരിച്ചേ മതിയാകൂ എന്നാണ് സര്‍ക്കാരിന്റെ നിലപാട്.
ലാന്റ് അസൈന്‍മെന്റ് അപേക്ഷകളും ദീര്‍ഘകാലമായി തീരുമാനമാകാതെ നില്‍ക്കുകയാണ്. ഈ രണ്ടിലും തീരുമാനമായാല്‍ യഥാര്‍ഥ ഭൂരഹിതര്‍ എത്രയെന്ന് മനസ്സിലാകും. തലമുറകളായി കൈവശം വെച്ചും കൃഷിനടത്തിയും വരുന്ന ഭൂമിക്കുേമല്‍ അവകാശം ലഭിക്കാതിരിക്കുന്നവര്‍ ഭൂരഹിതര്‍ക്ക് തുല്യര്‍ തന്നെയാണ്. ഇവരുടെ തീരാദുഃഖം പരിഹരിക്കപ്പെടേണ്ടതുണ്ട്. ഇതിനായി ജില്ലയില്‍ റവന്യു ഉദ്യോഗസ്ഥരുടെയും ജനപ്രതിനിധികളുടെയും യോഗം വിളിച്ചുചേര്‍ക്കുമെന്നും മന്ത്രി അറിയിച്ചു. ഭൂമിപ്രശ്‌നങ്ങള്‍ പരിഹരിക്കാനാവശ്യമായ നടപടികള്‍ക്ക് വേഗത വര്‍ധിപ്പിക്കുകയെന്നത് ജില്ലാ ഭരണകൂടത്തിന്റെ പ്രധാന ഉത്തരവാദിത്തമായി കാണണം. ഭൂമി സര്‍വതിന്റെയും അടിസ്ഥാനമാണ്. ഭൂമിയില്ലാത്തതുകൊണ്ട് മാത്രം തദ്ദേശസ്ഥാപനങ്ങളില്‍ നിന്ന് അര്‍ഹതപ്പെട്ട വീടും മറ്റ് ആനുകൂല്യങ്ങളും ലഭിക്കാത്തവരും നിരവധിയാണ്. ഭൂമിയില്ലാത്തവര്‍ക്ക് ഭൂമിയും വീടില്ലാത്തവര്‍ക്ക് വീടും എന്നതാണ് സര്‍കാരിന്റെ ലക്ഷ്യം. ജീവനക്കാരും ഈ സമീപനത്തോടെ പ്രവര്‍ത്തിക്കണമെന്ന് മന്ത്രി പറഞ്ഞു.
മേയര്‍ ഇ.പി.ലത, ജില്ലാ പഞ്ചായത്ത് പ്രസിഡണ്ട് കെ.വി.സുമേഷ്, കൗണ്‍സിലര്‍ അഡ്വ. ലിഷ ദീപക്, അസി. കലക്ടര്‍ ജെറോമിക് ജോര്‍ജ്, യൂണിയന്‍ ബാങ്ക് ഓഫ് ഇന്ത്യ കോഴിക്കോട് ചീഫ് മാനേജര്‍ സി.എം.വിജയന്‍, ലീഡ് ബാങ്ക് മാനേജര്‍ പി.സന്തോഷ്, അക്ഷയ പ്രൊജക്ട് മാനേജര്‍ സി.എം.മിഥുന്‍ കൃഷ്ണ, രാഷ്‌ട്രീയ പാര്‍ട്ടി നേതാക്കളായ എന്‍.ചന്ദ്രന്‍, അഡ്വ. സന്തോഷ് കുമാര്‍, കെ.രഞ്ജിത്, വി.രാജേഷ്‌പ്രേം, കെ.കെ.ജയപ്രകാശ്, വി.വി.കുഞ്ഞികൃഷ്ണന്‍, രതീഷ് ചിറക്കല്‍ എന്നിവര്‍ സംബന്ധിച്ചു. ജില്ലാ കലക്ടര്‍ പി.ബാലകിരണ്‍ സ്വാഗതവും എഡിഎം എച്ച്.ദിനേശന്‍ നന്ദിയും പറഞ്ഞു. സബ് കലക്ടര്‍ നവജ്യോത് ഖോസ റിപ്പോര്‍ട്ട് അവതരിപ്പിച്ചു. ഓഡിറ്റോറിയത്തിലെ വേദിയുടെ പശ്ചാത്തല ശില്‍പ്പമൊരുക്കിയ ശില്‍പ്പി ബാലന്‍ താനൂരിന് ചടങ്ങില്‍ റവന്യു വകുപ്പ് മന്ത്രി ഉപഹാരം നല്‍കി. ചടങ്ങിനോടനുബന്ധിച്ച് പുറത്തിറക്കിയ പ്രത്യേക പതിപ്പിന്റെ പ്രകാശനം ജില്ലാ കലക്ടര്‍ക്ക് നല്‍കി റവന്യു വകുപ്പ് മന്ത്രി നിര്‍വഹിച്ചു.
