ആലപ്പുഴ: പട്ടാപ്പകല് റോഡില് മാലപിടിച്ചുപറിക്കാന് ശ്രമം. ഇന്നലെ വൈകിട്ട് മൂന്നരയോടെ തത്തംപള്ളി മഠം റോഡില് അസീസി നിലയത്തിനു മുന്നിലുടെ പോയ യുവതിയുടെ സ്വര്ണമാലയാണ് പിടിച്ചുപറിക്കാന് ശ്രമം നടന്നത്.
യുവാവ് പുറകില് നിന്നു പതുങ്ങി നടന്നെത്തി സ്വര്ണമാല പറിച്ചെടുക്കാന് ശ്രമിക്കുകയായിരുന്നു. ബഹളം കൂട്ടിയപ്പോള് അയാള് ഓടിരക്ഷപ്പെട്ടു. പുറകെ ഓടിയെങ്കിലും റോഡില് മറ്റാരും ഇല്ലാതിരുന്നതിനാല് സഹായം ലഭ്യമായില്ല. ഏകദേശം 20 വയസ് പ്രായം തോന്നിക്കും. വേഷം കറുത്ത ഷര്ട്ടും ജീന്സും. തലമുടി പറ്റെ വെട്ടിയിരിക്കുന്നു. സംഭവം നടന്ന ഉടന് പോലീസിനെ വിവരം അറിയിച്ചു.
സ്കൂള് തുടങ്ങുന്നതും വിടുന്നതുമായ സമയങ്ങളില് ഇടവഴികളില് പെണ്കുട്ടികളെയും സ്ത്രീകളെയും മോട്ടോര് സൈക്കിളിലും സൈക്കിളിലും നടന്നുമെത്തി യുവാക്കളും മദ്ധ്യവയ്സക്കരും ഉപദ്രവിക്കുന്നതിനെക്കുറിച്ച് അനേകകാലമായി പരാതിയുണ്ട്. എന്നാല് അത്തരക്കാരെ പിടികൂടുന്നതായി അറിയുന്നില്ല.
ഇങ്ങനെ പട്ടണത്തില് ആവര്ത്തിക്കുന്ന അതിക്രമങ്ങളില് സത്വരശ്രദ്ധ പതിപ്പിച്ചു കുറ്റക്കാരെ പിടികൂടി ഉചിതമായ നടപടികള് സ്വീകരിക്കണമെന്ന് ജില്ലാ പോലീസ് മേധാവിയോട് തത്തംപള്ളി റസിഡന്റ്സ് അസോസിയേഷന് അഭ്യര്ത്ഥിച്ചു.
