കൊച്ചി: കാല് പന്തുകളിയിലെ വിസ്മയ താരത്തിന്റെ വിരമിക്കലിന്റെ ഞെട്ടലില് മെസി ആരാധകര്. കോപ്പ അമേരിക്കന് ഫുട്ബോളില് അര്ജന്റീനയുടെ പരാജയത്തിന്റെ ഞെട്ടലില് നിന്ന് മുക്തരാകും മുമ്പ് സൂപ്പര് താരം ലയണല് മെസിയുടെ വിരമിക്കല് പ്രഖ്യാപനം കൊച്ചിയിലെ ആരാധകരെ ദു:ഖത്തിലാഴ്ത്തി. ചിലിക്കെതിരെ പെനാല്റ്റി പാഴാക്കിയപ്പോള് നിരാശ ഉണ്ടായെങ്കിലും വിരമിക്കല് പ്രഖ്യാപനം പുറത്തു വന്നതോടെ മെസി ആരാധകരുടെ നിയന്ത്രണം വിട്ടു. പലരും കരഞ്ഞു കൊണ്ടാണ് തങ്ങളുടെ ദു:ഖം അറിയിച്ചത്. നെയ്മറും ക്രിസ്റ്റിയാനോയുമല്ല താരം, അത് സാക്ഷാല് മെസി തന്നെയാണെന്നായിരുന്നു ആലുവ സാദേശി കിരണിന്റെ പ്രതികരണം. ഒരിക്കലും പാടില്ലാത്തതായിരുന്നു തീരുമാനം. ഇനി, അര്ജ്ജന്റീനയെ കാണാം എന്നാണ് കൊച്ചി സ്വദേശിയും ഫുട്ബോള് കളിക്കാരനുമായ വിനയന് തുറന്നടിച്ചത്.
ഇന്നലെ പുലര്ച്ചെ അഞ്ചരയോടെ ടി.വികള്ക്ക് മുന്നില് കളി കാണാനെത്തിയ അര്ജന്റീനിയന് ആരാധകര് തികഞ്ഞ ആത്മ വിശ്വസത്തിലായിരുന്നു. കോപ്പയില് അണിനിരന്ന എല്ലാ ടീമുകളെക്കാള് മികച്ച ഫോമിലായിരുന്ന അര്ജന്റീനയ്ക്ക് തന്നെയായിരിരിക്കും കോപ്പയെന്ന് ഉറപ്പിച്ചെത്തിയ ആരാധകരെ നിരാശശപ്പെടുത്തുന്ന പ്രകടനമാണ് കാഴ്ച്ചവെച്ചതെങ്കിലും തോല്വിക്ക് ശേഷം അതിലും വലിയ ദുരന്തം ഉണ്ടാകുമെന്ന് ആരും പ്രതിക്ഷിച്ചില്ല. തോല് വിയുടെ വിവാദം രണ്ട് ദിവസം കൊണ്ട് മാറും, എന്നാല് ഈ തീരുമാനത്തിന്റെ വേദന ഒരിക്കലും മാറ്റാന് കഴിയില്ലെന്നാണ് മെസി ആരാധകര് ഒരേ മനസ്സോടെ പറയുന്നത്.
വിരമിക്കല് പ്രഖ്യാപിച്ചെങ്കിലും തീരുമാനം പിന്വലിക്കുമെന്ന വിശ്വാസവും പലരും പങ്കുവെച്ചു. രാജ്യം വിളിച്ചാല് മെസിയ്ക്ക് കളിക്കാതിരിക്കാനാകില്ലെന്നായിരുന്നു ഫോര്ട്ട് കൊച്ചി സ്വദേശി ബിജോയുടെ മറുപടി. ബ്രസീല് കോപ്പയില് പ്രഥാമിക റൗണ്ട് കടക്കാതെ പുറത്ത് പോകുകയും യൂറോ കപ്പില് ക്രിസ്റ്റാന്യേയുടെ പോര്ച്ചുഗല് മുടന്തി നീങ്ങിയതോടെ മെസി ആരാധകര് ഫെയ്സ് ബുക്കിലൂടെ നെയ്മര്, റൊണാള്ഡോ ആരാധകരെ കടിച്ചു കീറുകയായിരുന്നു. എന്നാല് കോപ്പയിലെ തോല്വിയും മെസിയുടെ വിരമിക്കലും മെസി വിരുദ്ധര് ആഘോഷിക്കുകായാണ്. മറുപടി പറയാനാകാതെ മെസി ആരാധകരും.
