മട്ടന്നൂര്: നല്ലൊരു സമൂഹത്തെയും അതുവഴി ഉത്തമ രാഷ്ട്രത്തെയും സൃഷ്ടിക്കുക എന്നതായിരിക്കണം വിദ്യാര്ത്ഥികളുടെ പരമമായ ലക്ഷ്യമെന്ന് ഡോ.കൂമുള്ളി ശിവരാമന്. മട്ടന്നൂര് മഹാദേവ ഹാളില് എസ്എസ്എല്സി, പ്ലസ്ടു, വിഎച്ച്എസ്ഇ ഉന്നത വിജയികളെ അനുമോദിക്കാനായി എബിവിപി മട്ടന്നൂര് നഗരസമതി സംഘടിപ്പിച്ച ‘പ്രേരണ-2016’ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. വായനയുടെ അഭാവമാണ് വിദ്യാര്ത്ഥികളില് കൃത്രിമമായി പല അറിവുകളും തേടി പോകാനുള്ള പ്രവണത ഉണ്ടാകുന്നത്. സ്വാമി വിവേകാനന്ദന് കണ്ട ഊര്ജ്ജസ്വലമായ സമൂഹത്തെ സൃഷ്ടിക്കാന് വിദ്യാര്ത്ഥികള് തയ്യാറാകണം. പുതു തലമുറ നമ്മുടെ പ്രാമാണിക പുരാണ ഗ്രന്ഥങ്ങളില് നിന്നും അകന്നുപോകുകയാണെന്നും രക്ഷിതാക്കള് ഇക്കാര്യത്തില് ജാഗ്രത പുലര്ത്തണമെന്നും അദ്ദേഹം പറഞ്ഞു.
ഉന്നത വിജയികളെ ഉപഹാരം നല്കി അദ്ദേഹം അനുമോദിച്ചു. എബിവിപി സംസ്ഥാന ജോയിന്റ് സെക്രട്ടറി കെ.അനൂപ് അധ്യക്ഷതവഹിച്ചു. സംസ്ഥാന സഹസഘടനാ സെക്രട്ടറി വി.മഹേഷ് മുഖ്യപ്രഭാഷണം നടത്തി. യുവമോര്ച്ച സംസ്ഥാന ഉപാധ്യക്ഷന് ബിജു ഏളക്കുഴി, രാമുണ്ണി മാസ്റ്റര് എന്നിവര് സംസാരിച്ചു. കെ.വി.ശ്യാംദാസ് സ്വാഗതവും വി.വി.അഭിഷേക് നന്ദിയും പറഞ്ഞു. എസ്എസ്എല്സി, പ്ലസ്ടു, വിഎച്ച്എസ്ഇ ഉന്നത വിജയികളായ നൂറില്പരം വിദ്യാര്ത്ഥികളെയാണ് ചടങ്ങില് അനുമോദിച്ചത്.
ഇരിട്ടി: വ്യക്തിയിലൂടെ സംസ്കൃത ചിത്തരായ സമൂഹത്തെ സൃഷ്ടിക്കാന് കഴിയുന്നതാവണം വിദ്യാഭ്യാസമെന്ന് തപസ്യ കലാ സാഹിത്യവേദി ജില്ലാ അദ്ധ്യക്ഷനും സാഹിത്യകാരനുമായ ഡോ. കൂമുള്ളി ശിവരാമന് പറഞ്ഞു. എ ബി വി പി ഇരിട്ടി നഗര് സമിതിയുടെ ആഭിമുഖ്യത്തില് ഇരിട്ടി മാരാര്ജി മന്ദിരത്തില് നടന്ന ‘പ്രേരണ 2016’ അനുമോദന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. അടിമകളെ സൃഷ്ടിക്കുകയല്ല ഭാരതീയ സംസ്കാരം ചെയ്യുന്നത്. യഥാര്ത്ഥ വിദ്യാഭ്യാസം എന്നത് ഹൃദയത്തിലേക്ക് സ്നേഹത്തിന്റെയും, മാനവികതയുടെയും സങ്കല്പ്പ വൈഖരി ഉണര്ത്തുന്ന താവണം. അമൃത വിദ്യയാണ് യഥാര്ഥത്തില് നമ്മുടെ വിദ്യ. എന്നാല് മൃത വിദ്യയാണ് ഇന്ന് നമ്മള് കുട്ടികള്ക്ക് നല്കുന്നത്. അദ്ദേഹം പറഞ്ഞു.
എബിവിപി സംസ്ഥാന കമ്മിറ്റി മെമ്പര് അമര്ജിത് അദ്ധ്യക്ഷത വഹിച്ചു. സംസ്ഥാന സംഘടനാ സിക്രട്ടറി മഹേഷ് മുഖ്യ ഭാഷണം നടത്തി. ഇരിട്ടി നഗരസഭാ കൗണ്സിലര് സത്യന് കൊമ്മേരി, പ്രിജു, വിഷ്ണു പ്രസാദ് തുടങ്ങിയവര് പ്രസംഗിച്ചു. ചടങ്ങില് എസ്എസഎല്സി, പ്ലസ്ടു പരീക്ഷകളില് ഉന്നത വിജയം നേടിയ വിദ്യാര്ഥികളെ അനുമോദിച്ചു.
