കന്നുകാലികളെ മോഷ്ടിക്കുന്നതായി പരാതി

അടൂര്‍: കന്നുകാലികളെ രാത്രികാലങ്ങളില്‍ വീടിന്റെ തൊഴുത്തില്‍ നിന്നും സാമൂഹ്യവിരുദ്ധര്‍ മോഷ്ടിച്ചുകൊണ്ടുപോകുന്നതായി പരാതി. പെരിങ്ങനാട് മേലൂട് വാര്‍ഡില്‍ രണ്ട് ആഴ്ച മുമ്പ് പതിനായിരം രൂപാ വിലവരുന്ന ഒരു പശുവിനെ കരിംകുറ്റിക്കല്‍ കിഴക്കേതില്‍ രാഘവന്റെ വീട്ടില്‍ നിന്നും രാത്രിയില്‍ മോഷ്ടിച്ചുകൊണ്ടുപോയിരുന്നു. കഴിഞ്ഞ ദിവസങ്ങളില്‍ മേലൂട് കലാലയം വീട്ടില്‍ സോമന്റെ പശുക്കിടാവിനെ മോഷ്ടിച്ചു. മേലൂട് കൃഷ്ണവിലാസം കൃഷ്ണന്‍കുട്ടിയുടെ ആടിനേയും പഴയമംഗലത്ത് സുഭാഷിണിയുടെ ആടിനേയും മോഷ്ടിച്ചിട്ടുണ്ട്. വാഹനത്തിലാണ് വളര്‍ത്തുമൃഗങ്ങളെ മോഷ്ടിച്ചുകൊണ്ടുപോകുന്നതെന്നും വാഹനത്തിന്റെ ശബ്ദം കേട്ടിരുന്നതായും വീട്ടുകാര്‍ പറയുന്നു. മോഷ്ടാക്കളെ ഉടന്‍ കണ്ടെത്തണമെന്നും പോലീസ് രാത്രികാല പട്രോളിങ് നടത്തണമെന്നും നാട്ടുകാര്‍ ആവശ്യപ്പെട്ടു.