കറുകച്ചാല്‍: കറുകച്ചാല്‍ കവലയിലെ ട്രാഫിക്ക് സിഗ്നല്‍ ലൈറ്റ് പ്രവര്‍ത്തന രഹിതമായിട്ടു വര്‍ഷങ്ങള്‍. സിഗ്നല്‍ സ്ഥാപിച്ചതിന് ശേഷം ഒരു വര്‍ഷത്തോളം ഇത് പ്രവര്‍ത്തിച്ചു പിന്നീട് നിലക്കുകയാണുണ്ടായത്.
കറുകച്ചാല്‍ ബസ്സ്റ്റാന്‍ഡിന്റെ നവീകരണ ജോലി നടന്ന സമയത്ത് നിര്‍ത്തിയ സിഗ്നല്‍ ലൈറ്റ് പിന്നീടങ്ങോട്ടു പ്രവര്‍ത്തിച്ചിട്ടില്ലെന്നാണ് ജനങ്ങള്‍ പറയുന്നത്. സിഗ്നല്‍ ഇല്ലാത്തത് മൂലം നാലുവശത്തുനിന്നും പാഞ്ഞെത്തുന്ന വാഹനങ്ങള്‍ അപകട ഭീഷണിയാകുന്നു. ഈ സമയങ്ങളില്‍ യാത്രക്കാര്‍ക്ക് റോഡു മുറിച്ചു കടക്കാന്‍ പാടുപെടുന്നു.
സീബ്രലൈന്‍ ഉണ്ടെങ്കിലും വാഹന യാത്രക്കാര്‍ ഇതൊന്നും പരിഗണിക്കാറില്ല. റോഡുകള്‍ ഇരട്ടവരിപ്പാതയായതോടെ അമിത വേഗത്തിലാണ് വാഹനങ്ങള്‍ പോകുന്നത്. ഇതിനെയൊക്കെ നിയന്ത്രിക്കാന്‍ ട്രാഫിക്ക് സിഗ്നല്‍ലൈറ്റ് ഉടന്‍ പ്രവര്‍ത്തനസജ്ജമാക്കണമെന്നാണ് പാതുജനങ്ങളുടെ ആവശ്യം.
