കണ്ണൂര്‍: തലശ്ശേരി കുട്ടിമാക്കൂലില്‍ ദളിത് യുവതികള്‍ക്കും കുടുംബത്തിനും നേരെ സിപിഎം നടത്തുന്ന പീഢനത്തെക്കുറിച്ച് സിപിഎം നേതാവ് വി.എസ്.അച്യുതാനന്ദന്‍ പ്രതികരിക്കണമെന്ന് കോണ്‍ഗ്രസ് നേതാവ് കൊടിക്കുന്നില്‍ സുരേഷ് എംപി പത്രസമ്മേളനത്തില്‍ പറഞ്ഞു. ദേശീയ തലത്തില്‍ത്തന്നെ പൊതു ചര്‍ച്ച ചെയ്യുന്ന വിഷയത്തില്‍ എന്തുകൊണ്ട് പ്രതികരിക്കുന്നില്ലെന്ന് വിഎസ് വ്യക്തമാക്കണം. തലശ്ശേരി സംഭവത്തില്‍ പോലീസ് സിപിഎമ്മിന്റെ ദാസന്മാരെപ്പോലെയാണ് പ്രവര്‍ത്തിക്കുന്നത്. ഇത്തരത്തില്‍ പ്രവര്‍ത്തിക്കുന്ന പോലീസ് ഉദ്യോഗസ്ഥര്‍ രാജ്യത്തെ പട്ടികജാതി-പട്ടികവര്‍ഗ്ഗ ജനവിഭാഗങ്ങളുമായി ബന്ധപ്പെട്ട നിയമം മനസ്സിലാക്കണം. പട്ടിക വര്‍ഗ്ഗങ്ങള്‍ക്കെതിരായ അതിക്രമങ്ങള്‍ വേണ്ടരീതിയില്‍ കൈകാര്യം ചെയ്യാത്ത ഉദ്യോഗസ്ഥര്‍ക്കെതിരേയും നടപടിയെടുക്കാന്‍ വകുപ്പുകള്‍ നിലവിലുണ്ട്. അതു കൊണ്ടുതന്നെ തലശ്ശേരി സംഭവത്തില്‍ നിക്ഷ്പക്ഷമായി പ്രവര്‍ത്തിച്ചില്ലെങ്കില്‍ കോടിയേരിക്കോ പിണറായിവിജയനോ നിങ്ങളെ രക്ഷിക്കാന്‍ കഴിയില്ലെന്ന് ഓര്‍ക്കുന്നത് നല്ലതാണെന്നും കൊടിക്കുന്നില്‍ പറഞ്ഞു. കുട്ടിമാക്കൂലില്‍ ദളിത് വനിതകളേയും കുടുംബത്തേയും ജയിലിലടച്ച ശേഷം മോശമായി ചിത്രീകരിച്ച് സംസാരിച്ച സിപിഎം നേതാക്കളെ പുറത്താക്കാന്‍ സിപിഎം നേതൃത്വം തയ്യാറാവണമെന്നും സിപിഎമ്മിന്റെ ദളിത് പ്രേമം കാപട്യമാണെന്നും അദ്ദേഹം പറഞ്ഞു. ഇന്നേവരെ പാര്‍ട്ടി ഭാരവാഹിത്വത്തില്‍ ഒരു ദളിതനും എത്തിച്ചേര്‍ന്നിട്ടില്ല. സവര്‍ണ്ണ മേധാവിത്തമാണ് എല്ലാ കാലത്തും സിപിഎമ്മിനെ നയിച്ചിട്ടുളളത്. അധികാരത്തിലേറുമ്പോള്‍ ജനങ്ങള്‍ക്ക് നല്‍കിയ വാക്കുപാലിക്കാന്‍ തയ്യാറാവാത്ത മുഖ്യമന്ത്രി കാട്ടുനീതിയാണ് കേരളത്തില്‍ നടപ്പിലാക്കുന്നതെന്നും അദ്ദേഹം പറഞ്ഞു.
തലശ്ശേരി സംഭവത്തെക്കുറിച്ച് വിഎസ് പ്രതികരിക്കണം : കൊടിക്കുന്നില്‍ സുരേഷ്
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.