നീസ്: ഗ്രൂപ്പ് ഇയില് നിന്ന് ആധികാരികമായി പ്രീ ക്വാര്ട്ടര് ബെര്ത്തുറപ്പിക്കാനുള്ള രണ്ടാമത്തെ ടീം ആരാകും? നിലവിലെ കണക്കനുസരിച്ച് സാധ്യത ബെല്ജിയത്തിന്. രണ്ടു ജയവുമായി ആറു പോയിന്റുള്ള ഇറ്റലിക്കു പിന്നില് ഒരു ജയത്തോടെ മൂന്നു പോയിന്റുമായി ബെല്ജിയമുണ്ട്. എന്നാല്, അവസാന കളിയില് എതിരാളികള് സ്ലാട്ടണ് ഇബ്രാഹിമോവിച്ചിന്റെ സ്വീഡന്. ഒരു പോയിന്റുള്ള സ്വീഡന് മൂന്നാമത്. അവസാന കളിയില് ഇറ്റലിയെ നേരിടുന്ന അയര്ലന്ഡ് റിപ്പബ്ലക്കിനും ഒരു പോയിന്റ്.
ഒരു സമനില പോലും ബെല്ജിയത്തെ മുന്നോട്ടു നയിക്കുമ്പോള് ജയത്തില് കുറഞ്ഞതൊന്നും സ്വീഡനെ സഹായിക്കില്ല. താര നിബിഡമാണ് ബെല്ജിയം. ഫിഫ റാങ്കിങ്ങില് രണ്ടാമതുള്ള ടീമില് യൂറോപ്പിലെ പ്രമുഖ ക്ലബ്ബുകളിലെ താരങ്ങളുണ്ട്.
ഏദന് ഹസാര്ഡ്, റൊമേലു ലുക്കാക്കു, കെവിന് ഡി ബ്ര്യൂണ്, മൗറെയ്ന് ഫെല്ലെയ്നി, തോമസ് വെര്മലെന്, തിബൗട്ട് കൗര്ട്ടിയസ് തുടങ്ങിയവരുണ്ട്. ഇബ്രാഹിമോവിച്ച് സ്വീഡിഷ് നിരയിലെ താര സാന്നിധ്യം. നായകന് കൂടിയായ ഇദ്ദേഹത്തിന് കഴിഞ്ഞ കളികളില് ഗോള് കണ്ടെത്താന് സാധിക്കാത്തത് സ്വീഡനു തിരിച്ചടിയായി. അയര്ലന്ഡിനോട് സമനിലയില് കുരുങ്ങിയ സ്വീഡന്, ഇറ്റലിയോട് തോറ്റു. മറുവശത്ത് ബെല്ജിയം അയര്ലന്ഡിനെ കീഴടക്കിയപ്പോള്, ഇറ്റലിയോട് കീഴടങ്ങി.
ജയിച്ചാല് ബെല്ജിയം ഗ്രൂപ്പില്നിന്ന് രണ്ടാമത്തെ ടീമായി മുന്നേറും. അപ്പോള് മികച്ച മൂന്നാം സ്ഥാനക്കാരെന്ന സാധ്യതയാണ് സ്വീഡനു മുന്നില് അവശേഷിക്കുന്നത്. അതിനു പക്ഷേ, അയര്ലന്ഡ് അവസാന കളിയില് ഇറ്റലിയോട് തോല്ക്കണം.
