മരട്: നാടിന്റെ യഥാര്‍ത്ഥ ചലനം അറിയുവാന്‍ ബാല്യത്തില്‍ തന്നെ പത്രവായന ശീലമാക്കണമെന്നും എല്ലാം പ്രതിഫലിപ്പിക്കുന്ന പത്രത്തില്‍ നിന്നും എന്ത് സ്വീകരിക്കണമെന്നത് വായനക്കാരന്‍ സ്വയം നിശ്ചയിക്കേണ്ടതാണെന്നും അമൃതഭാരതീവിദ്യാപീഠം പരീക്ഷാസമിതിയംഗം ബി. വിദ്യാസാഗരന്‍ അഭിപ്രായപ്പെട്ടു. ബാലഗോകുലം വായനാദിനത്തില്‍ മരട് നഗരത്തില്‍ സംഘടിപ്പിച്ച വായനാക്കൂട്ടത്തില്‍ ‘പത്രവായനാശീലം കുട്ടികളില്‍’ എന്ന വിഷയത്തില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. ബാലഗോകുലം ജില്ലാദ്ധ്യക്ഷന്‍ മേലേത്ത് രാധാകൃഷ്ണന്‍ അദ്ധ്യക്ഷത വഹിച്ച ചടങ്ങില്‍ ജില്ലാപൊതുകാര്യദര്‍ശി കെ.ജി. ശ്രീകുമാര്‍ ജില്ലാ സഹഭഗിനിപ്രമുഖ ലത. ആര്‍, മരട് നഗരം സംഘടനാകാര്യദര്‍ശി മഞ്ജുനാഥ്, പൊതുകാര്യദര്‍ശി രതീഷ്.പി.ആര്‍, നഗര്‍ ഭഗിനിപ്രമുഖ ഗംഗടീച്ചര്‍, രക്ഷാധികാരി ലിജി എന്നിവര്‍ പ്രസംഗിച്ചു. പ്രമുഖപത്രങ്ങളുടെ വായനയും വാര്‍ത്ത വിശകലനവും വായനാകൂട്ടത്തിന്റെ ഭാഗമായി നടന്നു.
വായനാകൂട്ടത്തിനുശേഷം നടന്ന ഭവന സമ്പര്‍ക്കത്തില്‍ ഇരുന്നൂറിലധികം വീടുകളില്‍ വായനാദിനത്തില്‍ വായിക്കാന്‍ അയല്‍പക്കത്ത് ഒരു പത്രം എന്ന നിലയില്‍ അമൃതപദം സാംസ്‌കാരിക പത്രിക എത്തിക്കുന്ന പരിപാടിയും ബാലഗോകുലം മരട് നഗരത്തില്‍ ഗോകുലാംഗങ്ങളുടെ നേതൃത്വത്തില്‍ നടന്നു. പളളുരുത്തി, കൊച്ചി, ഇടപ്പളളി, ചോറ്റാനിക്കര, എറണാകുളം എന്നീ നഗരങ്ങളിലെ വിവിധ ഗോകുലകേന്ദ്രങ്ങളിലും വായനദിനാചരണത്തിന്റെ ഭാഗമായി വായനാകൂട്ടം സംഘടിപ്പിച്ചു.
