ഈ മുഖ്യമന്ത്രിക്കറിയില്ലേ മേയ് 19 ഉച്ചസമയം മുതല് കേരളത്തില് അങ്ങോളമിങ്ങോളം സിപിഎം ഗുണ്ടകളുടെ വിളയാട്ടമായിരുന്നെന്ന്. ബിജെപി, ബിഡിജെഎസ്, കോണ്ഗ്രസ്, മുസ്ലിംലീഗ് തുടങ്ങിയ കക്ഷികളിലെ പ്രവര്ത്തകരേയും അവരുടെ കൈക്കുഞ്ഞുങ്ങള് ഉള്പ്പടെയുള്ള വീട്ടുകാരേയും സിപിഎം ആക്രമിച്ചില്ലേ? നിരവധി പേര്ക്ക് ഗുരുതരമായ പരിക്കേറ്റു, അംഗഭംഗം വന്നു, ഒരാള് കൊല്ലപ്പെട്ടു, വീടുകളും വാഹനങ്ങളും തീയിട്ടു, കടകളും വ്യാപാര സ്ഥാപനങ്ങളും കൊള്ളയടിച്ചു.
ഭരണം കിട്ടിയ ധാര്ഷ്ട്യത്തില് സിപിഎം പ്രവര്ത്തകര് മുഖ്യമന്ത്രിയുടെ നാട്ടില്പോലും നിരവധി പ്രവര്ത്തരുടെ വീടുകള് ആക്രമിച്ചല്ലോ. മാത്രമല്ല, ആ വീട്ടുകാരുടെ കിണറുകളില് ബാര്ബര്ഷാപ്പില്നിന്ന് മുടികൊണ്ടുവന്ന് വിതറി അവരുടെ വെള്ളംകുടി പോലും മുട്ടിച്ചു. കോട്ടയം ജില്ലയില് കുമരകത്ത് ഒരു ബിഡിജെഎസ് പ്രവര്ത്തകന്റെ പിതാവിന്റെ ബലികര്മ്മങ്ങള് നടന്നുകൊണ്ടിരിക്കെ അവിടെ സിപിഎം പ്രവര്ത്തകര് ഇരച്ചുകയറി കര്മ്മത്തിന് ഒരുക്കിവച്ചിരുന്ന വസ്തുക്കളെല്ലാം വലിച്ചെറിഞ്ഞ് പ്രായമായവരുടെപോലും തലതല്ലിപ്പൊളിച്ചില്ലേ?
മേല് പറഞ്ഞ അക്രമങ്ങള് നടത്തിയവര്ക്കെതിരായും മുഖംനോക്കാതെ നടപടി എടുക്കണമെന്നല്ലേ ബിജെപി ആവശ്യപ്പെട്ടത്?
എന്നിട്ടും എന്തേ മുഖ്യമന്ത്രി ഇതുവരെ മുഖംനോക്കാതെ ആ കുറ്റവാളികള്ക്കെതിരായി നടപടി എടുത്തില്ല? ഇപ്പോള് ഒറ്റപ്പാലം സംഭവത്തില് മാത്രം മുഖം നോക്കാതെ നടപടി എടുക്കണം എന്നു തോന്നാന് എന്താ കാരണം?
കാരണം ഒന്നേയുള്ളു. പിണറായി വിജയന് മുഖ്യമന്ത്രിയായി ഉയര്ന്നിട്ടില്ല ഇതുവരെ. അദ്ദേഹം തന്നെ കേന്ദ്ര ആഭ്യന്തര മന്ത്രിയോട് കേരളത്തിലെ ജനങ്ങളെ വിശേഷിപ്പിച്ചത് ‘ഞങ്ങളുടെ ആളുകള്’ എന്നും ‘നിങ്ങളുടെ ആളുകള്’ എന്നും ആണല്ലോ! അത് ഒരു മുഖ്യമന്ത്രിക്ക് ചേര്ന്ന നിലപാടല്ല. മറിച്ച്, വെറും ഒരു പാര്ട്ടിക്കാരന് മാത്രം ചേര്ന്ന സമീപനമാണ്. പിണറായി വിജയന് കേരളത്തിന്റെ മുഴുവന് മുഖ്യമന്ത്രി ആകുന്നത് എന്നായിരിക്കും.
ആര്. ഗോപാലകൃഷ്ണന് നായര്
ഏറ്റുമാനൂര്
