കൊട്ടിയൂര്: ഒരു മാസക്കാലം നീണ്ടുനിന്ന കൊട്ടിയൂര് ക്ഷേത്രത്തിലെ വൈശാഖ മഹോത്സവത്തിന്റെ അവസാന ചടങ്ങായ തൃക്കലശാട്ട് ഇന്ന് നടക്കും. ഇതോടനുബന്ധിച്ച് വാകച്ചാര്ത്ത്,ചോതിവിളക്ക് അണക്കല്, ശ്രീകോവില് പൊളിക്കല്, തൃക്കലശാട്ട്, കളഭാട്ടം, തണ്ടുമ്മലൂണ്, ഭണ്ഡാരം ഏറ്റുവാങ്ങല്, വാളുപോകല്, തൃച്ചന്ദനപ്പൊടി അഭിഷേകം, യാത്രാബലി, ഭണ്ഡാരം തിരിച്ചെഴുന്നള്ളത്ത് എന്നീ ചടങ്ങുകള് നടക്കും.
ഇടവ ചിത്രനാളില് ജാതിയൂര് മഠത്തില് നിന്നും കൊണ്ടുവന്ന തീ ഉപയോഗിച്ച് കത്തിച്ച ചോതിവിളക്കില് നിന്നും തേങ്ങ മുറികളില് അഗ്നി പകര്ന്നതിന് ശേഷമാണ് ചോതി വിളക്ക് അണക്കുക. തുടര്ന്ന് തേങ്ങ മുറികളിലെ വിളക്കാണ് ചടങ്ങുകള്ക്ക് ഉപയോഗിക്കുക. ഇതോടെ ചോതി വിളക്കിലെ അഗ്നി പകര്ന്ന് കത്തിച്ച മുഴുവന് വിളക്കുകളും അണക്കും. ഇതിന് ശേഷം നമ്പീശന്, വാര്യര് എന്നിവര് ചേര്ന്ന് താത്കാലിക ശ്രീകോവില് പൊളിച്ച് തിരുവഞ്ചിറയില് തള്ളും. പിന്നീടുള്ള ചടങ്ങുകള് ശ്രീകോവില് ഇല്ലാതെയാണ് നടക്കുക. തുടര്ന്നാണ് തൃക്കലശാട്ടം. ഇതിനു ശേഷം കുടപതികള് തിടപ്പള്ളിയില് പ്രവേശിച്ച് ഊണു കഴിക്കും. ഊണു കഴിഞ്ഞ ശേഷം ഭണ്ഡാരങ്ങള് മണത്തണയിലേക്ക് തിരിച്ചെഴുന്നള്ളിക്കുവാനായി ഏറ്റുവാങ്ങും.
കൂത്തരങ്ങിലെത്തിച്ച് കാവുകളാക്കിയാണ് ഇവ തിരിച്ചെഴുന്നള്ളിക്കുക. ഈ സമയം തന്നെ നെയ്യാട്ടദിനം മുതിരേരിയില് നിന്നും എഴുന്നള്ളിച്ചു കൊണ്ടുവന്ന വാള് മുതിരേരിയിലേക്ക് തന്നെ തിരിച്ച് എഴുന്നള്ളിച്ചുകൊണ്ടുപോകും. വാളു പോയ്ക്കഴിഞ്ഞാല് അമ്മാറക്കല് ബിംബത്തില് കുടപതികള് കൊണ്ടുവന്ന തൃച്ചന്ദനപ്പൊടി അഭിഷേകം ചെയ്യും. മണിത്തറയില് ഏറ്റവും ഒടുവിലായി നടക്കുന്ന ചടങ്ങാണ് യാത്രാബലി. യാത്രാബലി ചടങ്ങിന് പോകുന്ന ആചാര്യനും കൂട്ടരും ബാവലി കടന്നുകഴിഞ്ഞാല് കൂത്തരങ്ങില് നിന്നും ഭണ്ഡാരങ്ങള് കാവുകളാക്കി കുടപതികളും ചപ്പാരത്തിലെ വാളുകളുമായി വാളശ്ശന്മാരും വെള്ളിവിളക്കുകളുമായി ചെമ്പോട്ടിപ്പണിക്കരും പാണിയുടെയും ഓച്ചറുടെയും വാദ്യത്തിന്റെ അകമ്പടിയോടെ ഇക്കരേക്ക് യാത്രയാകും. നാളെ നടക്കുന്ന വറ്റടി ചടങ്ങോടു കൂടിയാണ് ഉത്സവം സമാപിക്കുക.
ഇന്നലെ ക്ഷേത്രത്തില് അത്തം ചതുശ്ശതം, വാളാട്ടം, കലശപൂജ എന്നിവ നടന്നു. ഉത്സവത്തോടനുബന്ധിച്ച് നടക്കുന്ന ആറാംഘട്ട ചടങ്ങുകളുടെ അവസാനത്തെ ചടങ്ങുകളാണ് ഇന്നലെ നടന്നത്. വാളാട്ടം, തേങ്ങയേറ്, പായസനിവേദ്യം, കൂത്ത് സമര്പ്പണം എന്നിവയാണ് ഇന്നലെ നടന്ന പ്രധാന ചടങ്ങുകള്. ഉത്സവവേളയിലെ നാലാമത്തെ വലിയവട്ടളം പായസമാണ് ഇന്നലെ നടന്നത്. ഇന്നലെ ആയിരം കുടം അഭിഷേകത്തോടെ ഈ വര്ഷത്തെ യാഗോത്സവ ചടങ്ങുകള് സമാപിച്ചു. ഇന്ന് നടക്കുന്ന തൃക്കലശാട്ടോടെ ഉത്സവം സമാപിക്കും.
