കണ്ണൂര്‍: കണ്ണൂര്‍ കലക്‌ട്രേറ്റ് കോംപ്ലക്‌സിന്റെ എഫ് ബ്ലോക്കില്‍ പൈപ്പ് പൊട്ടി കക്കൂസ് മാലിന്യം പുറത്തേക്കൊഴുകുന്നു. സാമൂഹ്യ ക്ഷേമവകുപ്പ്, ആരോഗ്യവകുപ്പ്, കൃഷി വകുപ്പ് തുടങ്ങി നിരവധി പ്രധാന ഓഫീസുകള്‍ പ്രവര്‍ത്തിക്കുന്ന കെട്ടിടത്തിലാണ് ഗുരുതരമായ ആരോഗ്യ പ്രശ്‌നങ്ങളുണ്ടാക്കുന്ന വിധത്തില്‍ കക്കൂസ് മാലിന്യം പുറത്തേക്കൊഴുകുന്നത്. പൈപ്പ് പൊട്ടിയിട്ട് ദിവസങ്ങളായെങ്കിലും ഇതുവരെയും പ്രശ്‌നപരിഹാരത്തിനാവശ്യമായ നടപടി സ്വീകരിച്ചിട്ടില്ല. പൈപ്പ് മാറ്റിസ്ഥാപിക്കുന്നതിന് പകരം പൊതുജനങ്ങളുടെ ശ്രദ്ധപതിയാതിരിക്കാന്‍ പൊട്ടിയ പൈപ്പിനടിയില്‍ മണ്ണ് വിതറിയിട്ടുണ്ട്. കെട്ടിടത്തിന്റെ മുകള്‍ നിലയില്‍ പ്രവര്‍ത്തിക്കുന്ന ഓഫീസുകളില്‍ ഉപയോഗിക്കുന്ന കക്കൂസുകളില്‍ നിന്നുള്ള മാലിന്യമാണ് പൊട്ടിയ പൈപ്പ് വഴി പുറത്തേക്കിറങ്ങുന്നത്. കഴിഞ്ഞദിവസം ആരോഗ്യ വകുപ്പ് അധികൃതര്‍ നേരിട്ടെത്തി കാര്യങ്ങള്‍ വിലിയിരുത്തുകയും ചെയ്തിരുന്നു. മഴ കനത്തതോടെ മലിന ജലം പുറത്തേക്കൊഴുകുകയാണ്. കെട്ടിടത്തിന് സമീപത്ത് കെട്ടിക്കിടക്കുന്ന മലിനജലം ഗുരുതരമായ ആരോഗ്യ പ്രശ്‌നങ്ങളാണുണ്ടാക്കുക. പൈപ്പ് പൊട്ടിയ കാര്യം ജീവനക്കാര്‍ അധികൃതരുടെ ശ്രദ്ധയില്‍പ്പെടുത്തിയിരുന്നെങ്കിലും ആവശ്യമായ നടപടിയെടുക്കാത്തതാണ് സ്ഥിതി രൂക്ഷമാക്കിയത്. വിവിധ ആവശ്യങ്ങള്‍ക്കായി നൂറുകണക്കിനാളുകള്‍ ദിനംപ്രതി സന്ദര്‍ശിക്കുന്ന ഓഫീസുകളാണ് ഇവിടെയുള്ളത്.
സാംക്രമിക രോഗങ്ങള്‍ തടയുന്നതിന് മഴക്കാല പൂര്‍വ്വ ശുചീകരണം ശക്തമാക്കുമെന്ന് ആരോഗ്യമന്ത്രി കെ.കെ.ശൈലജ ബന്ധപ്പെട്ട ഉദ്യോഗസ്ഥരുടെയും ത്രിതല പഞ്ചായത്ത് പ്രസിഡണ്ടുമാരുടെയും സാന്നിധ്യത്തില്‍ വ്യക്തമാക്കിയിരുന്നു. എന്നാല്‍ മന്ത്രിയുടെത് വെറും വാക്കായിരുന്നുവെന്നാണ് ജില്ലയുടെ വിവിധഭാഗങ്ങളില്‍ കെട്ടിക്കിടക്കുന്ന മാലിന്യക്കൂമ്പാരങ്ങള്‍ വ്യക്തമാക്കുന്നത്. ഭരണസിരാകേന്ദ്രമായ കലക്‌ട്രേറ്റ് കോംപ്ലക്‌സില്‍ പോലും പൂര്‍ണ്ണമായും മാലിന്യ നീക്കം ചെയ്യപ്പെട്ടിട്ടില്ല എന്നതാണ് വസ്തുത. ഭരണകൂടത്തിന്റെ നിസ്സംഗതയും കെടുകാര്യസ്തതയും അതിഗുരുതരമായ ആരോഗ്യപ്രശ്‌നങ്ങള്‍ വിളിച്ച് വരുത്തുമെന്നുറപ്പാണ്.
