കണ്ണൂര്: എല്ഡിഎഫ് ഭരണത്തില് മുഖ്യമന്ത്രിയുടെ നാട്ടില്പോലും എതിര്ശബ്ദങ്ങളെ അടിച്ചമര്ത്തുന്ന നിലപാടാണ് സിപിഎം സ്വീകരിക്കുന്നതെന്നും അധികാരത്തിലേറുമ്പോള് ജനങ്ങള്ക്ക് നല്കിയ വാക്കുകള് പ്രവര്ത്തനത്തിലൂടെ പാലിക്കാന് മുഖ്യമന്ത്രി പിണറായി വിജയന് തയ്യാറാകണമെന്നും മുന് മുഖ്യമന്ത്രി ഉമ്മന്ചാണ്ടി പറഞ്ഞു. കണ്ണൂര് സ്റ്റേഡിയം കോര്ണറില് ഡിസിസിയുടെ നേതൃത്വത്തില് സംഘടിപ്പിച്ച അക്രമങ്ങള്ക്കെതിരെയുള്ള പ്രതിഷേധ കൂട്ടായ്മ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കണ്ണൂര് ജില്ലയില് ഏറ്റവും കൂടുതല് അക്രമം ഉണ്ടായത് ഇടതുപക്ഷം അധികാരത്തില് വന്നപ്പോഴാണ്. എതിര്ശബ്ദങ്ങളെ അടിച്ചമര്ത്തുകയെന്നത് ജനാധിപത്യത്തിന്റെ രീതിയല്ല. ജനാധിപത്യത്തില് ആദ്യം വേണ്ടത് സഹിഷ്ണുതയാണ്. ജനാധിപത്യത്തിലെ അധികാരങ്ങളും ഗുണവശങ്ങളും സ്വീകരിക്കണം. മറ്റുള്ളവര്ക്ക് നേരെ കണ്ണടയ്ക്കുന്ന നിലപാട് ശരിയല്ല. കണ്ണൂര് ജില്ലയില് നടന്ന സംഭവങ്ങളുടെയൊക്കെ പിന്നിലേക്ക് നോക്കുമ്പോള് യാദൃശ്ചികമായ സംഭവമല്ല. രാഷ്ട്രീയമായി ചിന്തിക്കുന്നവര്ക്കെതിരെയും വ്യത്യസ്തമായി പ്രവര്ത്തിക്കുന്നവര്ക്കെതിരെയുമാണ് അക്രമം.
അക്രമത്തിന്റെ ഭാവത്തിലും ഭീഷണിയുടെ സ്വരത്തിലും ജനാധിപത്യം പിച്ചി ചീന്തുന്ന അവസ്ഥയാണ്. അക്രമത്തില് നിന്ന് ഇനിയെങ്കിലും പിന്തിരിയാന് സിപിഎം തയ്യാറായില്ലെങ്കില് അതിനു വലിയ വില നല്കേണ്ടി വരുമെന്നും ഉമ്മന്ചാണ്ടി പറഞ്ഞു. ഡിസിസി പ്രസിഡന്റ് കെ. സുരേന്ദ്രന് അധ്യക്ഷത വഹിച്ചു.
