ഇരിട്ടി: ഇരിട്ടിക്ക് അനുവദിച്ച ഗ്രാമീണ കോടതിയുടെ (ഗ്രാമീണ് ന്യായാലയ) പ്രവര്ത്തനം ഈ മാസം അവസാനം ഉദ്ഘാടനം ചെയ്യാന് തീരുമാനമായി. ഇതിന്റെ ഭാഗമായി കോടതിക്കായി കണ്ടുവെച്ച കല്ലിമുട്ടിയിലെ പായം പഞ്ചായത്തിന്റെ അധീനതയിലുള്ള കെട്ടിടം ജില്ലാ സെഷന്സ് പ്രിന്സിപ്പല് ജഡ്ജി വി.——ജെ.—അനില് കുമാര് സന്ദര്ശിച്ച് പ്രവര്ത്തനങ്ങള് വിലയിരുത്തി. കെട്ടിടവും കോടതിക്കാവശ്യമായ നിര്മ്മാണ പ്രവര്ത്തനങ്ങളും വിലയിരുത്തിയ അദ്ദേഹം സംതൃപ്തി രേഖപ്പെടുത്തി. കെട്ടിടം വിട്ടു നല്കുകയും കോടതിക്കായി വേണ്ട സൗകര്യങ്ങള് ഒരുക്കുകയും ചെയ്യുന്ന പായം പഞ്ചായത്ത,് ഇരിട്ടി ബ്ലോക്ക് പഞ്ചായത്ത് അധികൃതരുമായി നടത്തിയ കൂടിയാലോച്ചനക്ക് ശേഷം മന്ത്രിയുടെ ലഭ്യതക്കനുസരിച്ച് ഈ മാസം അവസാനം കോടതിയുടെ പ്രവര്ത്തനോദ്ഘാടനം നടത്താന് തത്വത്തില് തീരുമാനമായി. പായം പഞ്ചായത്ത് പ്രസിഡന്റ് എന്. അശോകന്, ഇരിട്ടി ബ്ലോക്ക് പഞ്ചായത്ത് പ്രസിഡന്റ് എന്.—ടി.റോസമ്മ, മുന് ബ്ലോക്ക് പഞ്ചായത്ത് പ്രസിഡന്റ് കെ.ശ്രീധരന്, പായം പഞ്ചായത്ത് സെക്രട്ടറി ജി.വി.അജിത് കുമാര്, അഡ്വ. ഷീന, അഡ്വ.ജോസ് ആന്റണി,അഡ്വ.എന്. എന്.—രമേശന്, പായം പഞ്ചായത്തംഗം രവീന്ദ്രന് എന്നിവരും സംഘത്തില് ഉണ്ടായിരുന്നു.
കാറില് രേഖകളില്ലാതെ കടത്തുകയായിരുന്ന സ്വര്ണ്ണം പിടികൂടി
ഇരിട്ടി: കാറില് രേഖകളില്ലാതെ കടത്തുകയായിരുന്ന 20 പവന് സ്വര്ണ്ണം എക്സൈസ് സംഘം പിടികൂടി. കിളിയന്തറ എക്സൈസ് ചെക്കുപോസ്റ്റില് വാഹന പരിശോധനക്കിടെയാണ് അഴീക്കോട് ചക്കരപ്പാറ സ്വദേശി കല്ലിങ്കല് റാഷിദില് നിന്നും എക്സൈസ് ഇന്സ്പെക്ടര് അബ്ദുള് അസീസിന്റെ നേതൃത്വത്തിലുള്ള സംഘം സ്വര്ണ്ണം പിടികൂടിയത്. സ്വര്ണ്ണത്തിനു രേഖകള് ഉണ്ടായിരുന്നില്ല. ഇരിട്ടി ഭാഗത്ത് നിന്നും കര്ണ്ണാടകത്തിലേക്ക് പോവുകയായിരുന്ന ഇന്നോവ കാറില് പിന്സീറ്റില് ഈത്തപ്പഴ പാക്കറ്റിനടിയില് സൂക്ഷിച്ച നിലയിലായിരുന്നു സ്വര്ണ്ണം. കണ്ണൂരിലെ ഒരു ജ്വല്ലറിയില് നിന്നും കുശാല് നഗറിലേക്ക് കൊണ്ടുപോവുകയാണ് സ്വര്ണ്ണം എന്നാണ് ഇയാള് എക്സൈസ് സംഘത്തോട് പറഞ്ഞത്. വാഹനത്തില് റാഷിദ് മാത്രമേ ഉണ്ടായിരുന്നുള്ളൂ. പിടികൂടിയ സ്വര്ണ്ണം പിന്നീട് വില്പ്പന നികുതി വകുപ്പിന് കൈമാറി. എക്സൈസ് ഇന്സ്പെക്ടര് അബ്ദുള് അസീസിനെ കൂടാതെ അസി. എക്സൈസ് ഇന്സ്പെക്ടര് പ്രേമരാജന്, പ്രിവന്റീവ് ഓഫീസര് കെ.—പി.—വിജയന്, സിവില് ഓഫീസര്മാരായ പി.ജലീഷ്, ബാബു ജയേഷ്, പി.—ടി.—സജിത്ത് എന്നിവരും സംഘത്തില് ഉണ്ടായിരുന്നു.
