കോഴിക്കോട്: ഇതര സംസ്ഥാന തൊഴിലാളികള്ക്ക് നിര്ബന്ധ രജിസ്ട്രേഷന് നിഷ്കര്ഷിക്കുന്ന മാര്ഗ നിര്ദേശങ്ങള്ക്ക് ഏതാനും മാസങ്ങള്ക്കുള്ളില് രൂപം നല്കുമെന്ന് തൊഴില്,-എക്സൈസ് വകുപ്പ് മന്ത്രി ടി.പി രാമകൃഷ്ണന് അറിയിച്ചു. അന്താരാഷ്ട്ര ബാലവേല വിരുദ്ധദിന പരിപാടികളുടെ സംസ്ഥാനതല ഉദ്ഘാടനം നളന്ദ ഓഡിറ്റോറിയത്തില് നിര്വഹിക്കുകയായിരുന്നു അദ്ദേഹം.
കേരളത്തിലെ ഇതരസംസ്ഥാന തൊഴിലാളികളുടെ വ്യക്തമായ കണക്ക് ഇപ്പോള് ലഭ്യമല്ല. ഇവരുടെകൂടെ വരുന്ന 18 വയസ്സിന് താഴെയുള്ള കുട്ടികളെക്കൊണ്ടും ജോലി ചെയ്യിക്കുന്നുണ്ട്. തൊഴിലാളികള് മലയാളികളാണെങ്കിലും അല്ലെങ്കിലും അവരെയെല്ലാം തൊഴില്നിയമങ്ങളുടെ പരിധിയില് കൊണ്ടുവരും. ദാരിദ്ര്യവും വിദ്യാഭ്യാസമില്ലായ്മയും സാമൂഹ്യ പിന്നാക്കാവസ്ഥയുമാണ് ബാലവേലയിലേക്ക് നയിക്കുന്നത്. ആ അവസ്ഥ ഒഴിവാക്കുകയാണ് അടിസ്ഥാന പരിഹാരം. ബാലവേല തടയുന്ന 1986ലെ കേന്ദ്ര നിയമപ്രകാരം ജില്ലാ കലക്ടര്മാരുടെ നേതൃത്വത്തില് ചൈല്ഡ് ലേബര് റിഹാബിലിറ്റേഷന് കം വെല്ഫെയര് കമ്മിറ്റികളുണ്ട്. ഇത് ഫലപ്രദമായി പ്രവര്ത്തിക്കണം. പൊതുസമൂഹത്തിന്റെകൂടി ജാഗ്രതയുണ്ടെങ്കിലേ ബാലവേല പൂര്ണമായി ഒഴിവാക്കാനാവു. തൊഴിലുടമകള്ക്കും തൊഴിലാളിസംഘടനകള്ക്കും ഇക്കാര്യത്തില് വലിയ പങ്ക് വഹിക്കാനുണ്ട്. മന്ത്രി പറഞ്ഞു.ചടങ്ങില് ഡോ. എം.കെ മുനീര് എം.എല്.എ അധ്യക്ഷത വഹിച്ചു. അഡീഷണല് ലേബര് കമ്മീഷണര് എ. അലക്സാണ്ടര്, തൊഴിലാളി സംഘടനാ നേതാക്കളായ ടി. ദാസന്, അഡ്വ. എം. രാജന്,പി.കെ നാസര് യു. പോക്കര്,വ്യാപാരി വ്യവസായി ഏകോപനസമിതി സംസ്ഥാന പ്രസിഡണ്ട് ടി. നസിറുദ്ദീന്, വ്യാപാരി വ്യവസായസമിതി പ്രതിനിധി സി.വി ഇക്ബാല്, ചൈല്ഡ്ലൈന് പ്രതിനിധി മുഹമ്മദലി, റീജ്യണല് ജോയന്റ് ലേബര് കമ്മീഷണര് കെ.എം സുനില് പ്രസംഗിച്ചു.
